Sasabak na naman sa panibagong hamon ang mga atletang Pinoy sa London Olympics na aarangkada na ngayong linggo.

Bukas (July 24) sa “Patrol ng Pilipino,” susundan ni Gretchen Malalad ang kwento sa likod ng paghahanda at sakripisyo ng mga pambato ng bansa na nag-aasam na makapag-uwi ng parangal mula sa prestihiyosong kompetisyon. Isa na kaya sa kanila ang makakasungkit ng medalya para sa Pilipinas?

Labing-isa ang kinatawan ng bansa sa Olympics ngayong taon pero sa kasaysayan ito na ang pinakamaliit na delegasyon ng bansa simula noong 1932. Sa kabila ng kakulangan sa pondo at pasilidad para sa mga atletang Pinoy, paano nga ba nagagawang maging matatag at inspirado ng mga Olympian para pagbutihin ang laban sa London?

Samantala, hihimayin naman ni Maan Macapagal ang mga isyung ibinabato sa Metro Manila Development Authority dahil sa mahigpit na pagpapatupad ng yellow lane sa kahabaan ng EDSA na nagbabawal sa mga pampasaherong bus na lumabas sa guhit na ito at dumaan sa mga flyover at ilalim ng mga tulay sa EDSA.

Sinasabing ang pinaigting na batas na ito umano’y nagbibigay ng importansiya sa mga pribadong sasakyan lamang ngunit ayon sa MMDA, isang paraan ito upang mabawasan ang mga aksidente at pagsisikip ng daloy ng trapiko sa kalsada. Ito na nga ba ang solusyon sa matagal nang problema sa EDSA?

Alamin ang kwento sa likod ng mga nagbabagang balita bukas (July 24) sa “Patrol ng Pilipino” pagakatapos ng “Bandila” sa ABS-CBN o sa mas maagang pag-ere nito sa DZMM TeleRadyo (SkyCable Channel 26), 9:15 p.m.

Related Links

• ABS-CBN - Patrol Ng Pilipino