Titiktikan ni Anthony Taberna ang isang grupo na diumano’y nagbibigay ng hindi awtorisadong training para makapasok sa Armed Forces of the Philippines (AFP) ngayong Lunes (July 30) sa “XXX.”

Isang retiradong sundalo ang lumapit sa “XXX” para isumbong ang modus operandi ng grupo kung saan maari ka raw maging miyembro ng AFP kapag ikaw ay nagdaan sa training na ibibigay nila na nagkakahalagang P650. Nang tanungin ni Anthony ang AFP tungkol dito, wala raw silang alam o pinapayagang kahit anong private group na puwedeng magsanay para sa AFP.

Habang inaalam ni Anthony ang puno’t dulo ng reklamo ay sasama naman si Julius Babao sa isa na namang “Oplan: Paglalansag.” Layunin ng operasyon na salakayin ang mga taong nag-aalaga ng hindi lisensyadong mga baril bilang paghahanda sa 2013 halalan. Una na itong isinagawa sa Nueva Ecija, kung saan saksi ang “XXX” sa buong pangyayari, at ngayon naman ay susugod ang PNP Intelligence group sa isang lugar sa Quezon province.

Samantala, kukumustahin naman ni Pinky Webb ang biktima ng rape na si “Catherine” isang taon matapos lumapit ang dalagita sa “XXX.” Nang malaman ang kahalayang ginawa sa kanya, agad na nagsagawa ang programa ng surveillance at arrest operation sa suspek. Kamakailan lang ay ibinaba na ng korte ang hatol nito na pagkakakulong kaya naman sa wakas ay nanaig na ang hustisya para sa menor de edad. Kumusta na kaya siya? Nakabangon na kaya siya sa kahalayang sinapit noong nakaraang taon?

Tunghayan ang buong ulat sa “XXX” ngayong Lunes (July 30) pagkatapos ng “Bandila” sa ABS-CBN, o sa mas maagang pagere nito sa DZMM TeleRadyo (SkyCable Channel 26), 9:15 p.m.

Related Links

• ABS-CBN - XXX