Matapos ang kanyang kontrobersyal at top-rating "Maalaala Mo Kaya" episode niyang 'Manika' noong 2012 na tungkol sa isang batang ginahasa sa harap ng kanyang ina, magbabalik-"MMK" ngayong 2013 ang Kapamilya teen star na si Jane Oineza upang muling kurutin ang puso ng TV viewers sa isa na namang challenging role.

Sa episode Sabado (Enero 12), bibigyang buhay ni Jane and karakter ni April, isang dalagitang may sakit na cerebral palsy na pilit namumuhay nang normal sa tulong ng kanyang pamilya, lalong-lalo na ng nakababata niyang kapatid na si Dhayveed (Kyle Balili). Naging sandalan ni April ang kapatid hanggang sila ay mag-aral. Ngunit susubukin ang tatag ng kanilang samahan pagsapit ng high school dahil sa matinding panlalait at panunuksong matatanggap ni Dhayveed mula sa kanyang mga kaklase dahil sa kakaibang kondisyon ng kanyang ate. Sa sandaling talikuran siya ng kapatid, paano haharapin ni April mag-isa ang lipunang mapanghusga sa mga tulad niya?

Sa panibagong "MMK" episode ni Jane, muli niyang makakasama ang writer na si Benson Logronio at direktor na si Nuel Crisostomo Naval na kapwa may likha ng kontrobersyal niyang 'Manika' episode. Ang upcoming episode ay sa ilalim ng pagsasaliksik ni Agatha Lee Ruadap.
Bukod kina Jane at Kyle, tampok rin ngayong Sabado sina Blythe Brillantes, Joshen Bernardo, Bing Davao at Susan Africa.

Huwag palampasin ang isa na namang makabagdamdaming “MMK” episode ngayong Sabado, pagkatapos ng “Wansapanataym,” sa ABS-CBN. Para sa iba pang updates, mag log on sa www.mmk.abs-cbn.com, sundan ang @MMKOfficial sa Twitter, at i-“like” ang www.facebook.com/MMKOfficial.

Related Links

• ABS-CBN - Maalaala Mo Kaya