Isang pagkilala ang tatanggapin nina Tonton Gutierrez at Precious Lara Quigaman mula sa Philippine National Police. Ang dalawang artista ng May Bukas Pa ay kabilang sa mga special awardees ng PNP sa kanilang 14th Police Community Relations Month celebration. Sa nasabing okasyon ay paparangalan ng PNP ang ilang units, personnel, organisasyon, at ilang taong nakatulong sa pag-iibayo ng mabuting relasyon ng pulisya sa komunidad.

Ang PNP ay nagpadala ng isang liham-imbitasyon sa Production Manager ng May Bukas Pa na si Ethel M. Espiritu. Nais ng PNP na dumalo sina Tonton at Lara nang naka police uniform sa kanilang flag ceremony sa July 6, 2009 kung saan ibibigay ang kanilang parangal.

Mukhang natuwa ang pamunuan ng PNP sa pagiging magandang ehemplo nina Tonton at Lara sa May Bukas Pa. Sa top-rating primetime teleserye ay gumaganap sina Tonton at Lara bilang sina Mario at Selda, ang mag-asawang pulis na naninilbihan nang tapat sa barangay Bagong Pag-asa. Sinasabing ang mga karakter ng dalawang aktor ay naglalayong ibahin ang imahe ng mga pulis at maibalik ang tiwala ng mga mamamayan sa mga kinikilalang law enforcers.

Related Link

• ABS-CBN's May Bukas Pa