Edward at Grae, sinumpa bilang kambal na magkaribal sa "Hiwaga ng Kambat"

Isang kwento ng pinaglayong kambal na itinadhanang maging magkaribal ang nagdadala ng hiwaga sa mga manonood sa pinakabagong fantaseryeng “Hiwaga ng Kambat,” na pinagbibidahan nina Edward Barber at Grae Fernandez at napapanood tuwing Linggo sa ABS-CBN.
 
Gumaganap ang dalawang aktor na sina Edward at Grae bilang ang kambal na sina Iking at Mateo. Isinilang na mukhang paniki si Iking, samantalang normal at lumaki sa marangyang pamumuhay si Mateo. Ang kanilang pagkakaiba ang dahilan ng malalim nilang hidwaan dahil sa paulit-ulit na panlalait ni Mateo kay Iking. Pero liliit ang kanilang mundo sa pagkakataong malaman nila ang sekretong babago sa takbo ng kanilang mga buhay.
 
Agad na pumatok ang mahiwagang kwento ng serye matapos magtala ang pilot episode nito noong Abril 21 ng national TV rating na 24.4%, kumpara sa 12.1% ng “Daig Kayo ng Lola Ko,” ayon sa datos ng Kantar Media. Muli itong nanguna sa timeslot nito noong Linggo (Abril 28) nang magtala ito ng 22.7%, kontra sa kapat nito na nakakuha ng 14%.
 
Umani rin ito ng sari-saring papuri online mula sa netizens na hindi napigilan ang pagkasabik sa bawat eksena ng fantaserye.
 
“Ang galing! Action, love story, comedy, fantasy, and moral story in one. One-stop teleserye. Looking forward to next week,” sabi ng Twitter user na si @Lorre_Hanae.
 
“Ang intense. Simula pa lang ang dami na agad nangyari. Marami na agad nabubuong tanong sa utak. Talagang tututukan mo ang kwento ng Kambat,” tweet naman ni @ecuttel.
 
“Maganda ang pacing ng story! Bawat eksena mahalaga kasi may maga-gather ka na info para ma-feed ang curiosity mo but it still leaves you wanting for more to know more. Excited na sa next episodes,” komento naman ng YouTube user na si Ma. Isabel Cura.
 
“Maraming moral lessons ang makukuha dito, kahit anong uri ng tao matututo tayong pahalagahan at kailangan gumawa ng mabuti para sa kapwa,” papuri naman ng isa pang YouTube user na si April Romel Caro.
 
Marami pa ngang dapat abangan ngayong Linggo (Mayo 5) dahil muling magtatapat sina Iking at Mateo, at sa pagkakataong ito, magpapagalingan sila sa arnis. Magugulat si Mateo sa husay ni Iking sa kabila ng pagiging bulag nito at maghahamon pa ng rematch. Pero bago pa man matapos ang laban nila, tatakas si Iking sa takot na makita siya ng kaaway na magpalit-anyo bilang paniki.
 
Mabisto na nga kaya ni Mateo lihim ni Iking?
 
Panoorin ang “Hiwaga ng Kambat” bago mag-“Idol Philippines” tuwing Linggo sa ABS-CBN at ABS-CBN HD (SkyCable ch 167). Para sa updates, pumunta lamang sa abscbnpr.com at i-follow ang @abscbnpr sa Facebook, Twitter, at Instagram.