News Releases

English | Tagalog

MNL48 oshis magdadala ng kilabot sa bagong digital mini series na "MNL48 Presents: Chain"

June 26, 2020 AT 10:10 AM

Kakaibang mga miyembro ng MNL48, o kilala rin sa tawag na oshis ng fans, ang matutunghayan dahil katatakutan ang dala nila sa bagong digital mini series na “MNL48 Presents: Chain,” matapos ang premiere nito noong Huwebes (June 25) sa YouTube. 

Matutunghayan sa serye ang kwento ni Tina Severo, isang estudyante ng MNL University na misteryosong nawala at hindi na nahanap pa. Sa araw ng pagtigil sa paghahanap kay Tina, isang chain video na nagpapakita ng kanyang huling sandali ang kumalat sa social media. Ngunit isang sumpa ang dala ng video na ito: ang makakatanggap ng video ay kailangan i-share ito sa iba dahil kung hindi, malalagay ang buhay nila sa panganib. 

Nagkaroon ng botohan para sa magiging bida ng four-part mini series, at ang iniluklok ng fans para maging pangunahing karakter ay sina Jamie Alberto, Daryll Matalino, at Jaydee Villaruel matapos silang makakuha ng pinakamaraming diamond votes sa KUMU app. 

Kinunan sa kalagitnaan ng quarantine, ang palabas ay nagbigay ng pagkakataon sa oshis na magpakitang gilas maging sa likod ng kamera dahil sila mismo ang kumuha at nag-ayos ng mga eksena sa tulong ng direksyon ng production crew gamit ang video calls.  

Mapapanood ang iba pang episodes ng “MNL48 Presents: Chain” linggo-linggo tuwing Huwebes.  

Kasama ang “MNL48 Presents” sa humahabang listahan ng digital shows sa ilalim ng OKS (Online Kapamilya Shows). Para sa updates sa MNL48, pumunta lamang sa official Facebook (https://www.facebook.com/mnl48official/), Twitter (@mnl48official), Instagram (@mnl48official), at YouTube account ng grupo.