Muling isasapelikula ang classic at award-winning film na Muro-Ami na pinagbidahan ni Cesar Montano at idinirek ng yumaong Marilou Diaz-Abaya. Ginawa ang Muro-Ami noong 1999 at ipinalabas noong January 2000.

This time, ang bida ng pelikula na si Cesar ang magre-remake at magdidirek nito. Kasalukuyan nang binubuo ang script at cast ng pelikula na sisimulan ang shooting sa July 2023.

“This is a tribute to my dear brilliant director Marilou Diaz-Abaya,” pahayag ni Cesar nang makausap siya ng PUSH.

“Pero iba na ang istorya nito, hindi na sa dagat, city na siya. Yung Muro-Ami kasi namin is about child labor sa dagat. Na-expose namin yung exploitation ng mga kabataan sa pangingisda.

“Muro-ami means fishnet, so ito rin ganun din, mga kabataan din ang concern dito, mga kabataan na nagagamit sa maling kaparaanan like pinagbabawal na gamot, yung pagdadala niyan.

“Kasi these are young people’s…. hindi mo puwedeng ikulong ito, eh, so puwede nilang gamitin. Mga below 15 kasi ang mga yan, so nagagamit… Yon naman ang kuwentong tinahak ng karakter ni Fredo, yung karakter ko dati,” dagdag pang pahayag ng award-winning actor-director.

BASAHIN: Cesar Montano hangad na magkabalikan sina Sunshine Cruz at Macky Mathay

Ibinalita din ni Cesar na kasama sa remake n Muro-Ami ang anak niyang si Diego Loyzaga.

“Yes, oo. Umoo na ako sa kanya, he’s part of the cast,” sabi ni Cesar.

Eh, how about Jhong Hilario na kasama sa original cast ng movie?

Sagot ni Cesar, “Si Jhong puwede pa, eh. Hindi pa naman kasi clear kung paano siya namatay o patay na ba siya sa kuwento. Possible si Jhong Hilario na maisama. Binubuo pa lang kasi namin yung script.”

Buong pagmamalaki ring ibinida ng aktor kung gaano siya ka-proud ngayon sa anak na si Diego bilang aktor.

Aniya, “Magaling siya, nagulat ako. Nung una kaming magkasama sa Maid In Malacañang, I was really surprised. Sabi ko, ‘Aba, ibang klase na ring umarte ‘to, ah.’

BASAHIN: Sunshine Cruz says reconciliation with Cesar Montano completed ‘lacking piece’ in their daughters’ hearts

Aminado naman si Cesar na malaking pressure para sa kanya ang i-remake ang Muro-Ami lalo pa’t si Direk Marilou ang unang nagdirek nito.

“Oo nga, eh. Kaya hindi ko nilagay sa dagat, nilagay ko na lang dito sa lupa. Totoo yan. Sabi ko nga, kung gagawin ko ulit yung Rizal kahit pa apat na beses uulitin ko yan, pero Muro-Ami sa dagat, naku magdadalawang isip talaga ako.

“Sobrang hirap ng mga underwater scenes namin. Five months kami sa dagat na wala kaming kapahingahan kundi tubig-dagat. Kasi naka-dock yung boat namin don sa wall. Hindi ka naman pupunta sa shore para magpahinga, andodon ka lang. 

“So pag nagse-set up sila sa boat bababa kami sa dagat. Five months yon. Di ba pag nagbabakasyon ka sa beach isang linggo lang yon, yung sa amin five months. Sawang-sawa ako, wala na nga akong iiitim pa, eh.

“Yung first three days to four days naglalagay pa ako sunblock, eh, pang-fifth day tinapon ko na yung sunblock. Tuwang-tuwa naman si Direk Marilou sa kulay ko kahit nagka-discoloration na ako,” pagre-recall pa ni Cesar sa naging karanasan niya habang ginagawa ang obra ni Marilou Diaz-Abaya.