Hindi lang sina Maine Mendoza, Maja Salvador at Nathalie Hart ang nagpakasal sa kani-kanilang partner. Humabol din ang singer-comedienne na si Gladys Guevarra.

Kasal na rin si Gladys at masaya niya itong ibinalita sa kanyang followers sa pamamagitan ng Facebook.

Ikiinuwento ni Gladys na super blessed at happy siya dahil natagpuan na niya ang kanyang partner sa buhay.

“I thank God dahil hindi hatred ang namalagi sa puso ko. I am blessed by God din to continue to love again. And ipinaramdam din sa akin ni Papa God na hindi totoong wala ng magmamahal sa akin,” simula ni Gladys sa kanyang FB post kasama ang kanyang larawan na naka-wedding dress.

Labis niyang pinasasalamatan ang Panginoon dahil binigyan siya nito ng lakas ng loob na magpatuloy sa buhay sa kabila ng mga pinagdaanan niya.

“May katapusan pala lahat ng pain at heartaches. Pinabangon ako muli ni Lord at binigyan ng isang katulad ni AD na minahal ako at minamahal ng buong buo at wala ng kahit anong question,” pagpapatuloy pa ni Gladys.

Gayunpaman, hindi ini-reveal ng komedyana kung ano ang ibig sabihin ng AD at ang totoong pangalan ng kanyang asawa.

Ani Gladys: “Hindi ako uminda sa lahat ng sakit at pagsubok, knowing mas maraming sakit, hirap at pagpapahirap ang ginawa kay Jesus. Iniyakan ko? Oo, pero hindi ako pinabayaan ni Lord." 

“At mas ipinaramdam pa sa akin ng Panginoon na mas deserve ko pang lumigaya ng mas maligaya pa sa inakala kong ligaya," dagdag pa niya. 

Sabi pa ni Gladys, tama raw ang Panginoon na may inilaan Siya para sa kanya at hindi siya dapat nagmamadali.

“Ngayon alam ko na ng malinaw bakit nangyari ang lahat ng nangyari. May mas magandang plano si Lord. Kaya thank you Papa God sa lahat lahat ng ito. Ibinabalik ko po ang lahat ng ito sa iyo. Sa iyo po ang lahajt ng aking papuri Father God," saad ni Gladys. 

Nagpasalamat din siya sa mga taong hindi nang-iwan sa kanya.

"Ang pasasalamat ko sa lahat ng taong hindi ako iniwan sa ere at patuloy na nagmahal, nagmamahal at sumusuporta sa akin hanggang ngayon. Smile nalang ako ng smile ngayon. Let us all just spread LOVE!” lahad  ni Gladys.

Ang sinasabi ni Gladys na nangyari sa buhay niya ay ang kontrobersiya kung saan napagbintangan siyang kabit ni Pambansang Kolokoy na naging dahilan raw ng kanilang paghihiwalay ni Marites.

Sa isang Facebook Live, ipinasilip niya ang kanyang napangasawa ngunit hindi niya ipinakita ang mukha nito.

“For now, ang isinasapuso ko at ang nasa isip ko is ang asawa ko is not anymore for public consumption. This is my private life, sana po ibigay n’yo na po ito sa akin. Hindi po ito collab, ito po ay katotohanan,” pagbabahagi ni Gladys.

Samantala, ikinasal na rin si Gladys noong May 2021 pero divorce rin sila ng kanyang partner na iyon. Kaya naman malaya na ulit siyang magkaroon ng bagong partner ngayon.