Mike Enriquez, pumanaw na sa edad na 71

Nagluluksa ngayon ang mundo ng pamamahayag pati na ang sambayanang Pilipino dahil sa pagpanaw ng beteranong broadcast journalist na si Mike Enriquez. 

Kinumpirma ng flagship news program ng GMA-7 na 24 Oras ang pagpanaw ni Mike. 

"It is with profound sadness that GMA Network announces the passing of our beloved Kapuso, Mr. Miguel 'Mike' C. Enriquez, who peacefully joined our creator on August 29, 2023," saad ng GMA-7 sa kanilang inilabas na pahayag nitong Martes, ika-29 ng Agosto. 

“[He] became part of GMA Network in 1995, wholeheartedly serving the Filipino audience for 54 years,” ani pa ng GMA-7.

“His dedication to the industry will serve as an inspiration to all. We pray for the eternal repose of our beloved Kapuso,” pagpapatuloy pa ng Kapuso network.

Hindi naman napigilang maging emosyonal ni Mel Tiangco na nakasama ni Mike ng ilang taon sa nasabing programa. 

Una nang dumaan si Mike sa isang heart bypass surgery noong taong 2018. 

Nag-medical leave si Mike noong Disyembre 2021 dahil kinailangan nitong dumaan sa isang kidney transplant.

Ipinanganak bilang Miguel Castro Enriquez, itunuturing na haligi ng GMA Integrated News and Public Affairs si Mike Enriquez. 

Nagsimula ang karera ni Mike bilang staff announcer sa Manila Broadcasting Company noong taong 1969. 

.Naging bahagi si Mike ng iba’t-ibang news organizations kabilang na ang Freedom Broadcasting Radio Network at Radio Mindanao Network o RMN. 

Nang lumipat sa GMA Network, nabigyan si Mike ng iba’t-ibang programa kabilang na ang isang newscast kung saan nakasama niya ang ABS-CBN broadcast journalist na si Karen Davila. 

Maliban sa Super Balita sa Umaga at Saksi sa Dobol B, isa sa mga programang inaabangan ng mga tao kay Mike ang Imbestigador at 24 Oras.

Nakasama ni Mike sina Mel at Vicky Morales sa nasabing programa ng ilang taon.