MANILA - Kinwestyon ng grupong 'Laban Konsyumer' ang desisyon ng Department of Trade and Industry (DTI) na tanggalin ang standard retail price (SRP) at hayaan na lang na ang kompetisyon ng mga pribadong kumpanya ang magdikta ng presyo ng mga pangunahing bilihin.

Giit ni dating DTI undersecretary at ngayon ay presidente ng Laban Konsyumer Atty. Vic Dimagiba, wala nang proteksyon ang mga mamimili sa pagtaas ng presyo dahil monitoring na lang ang gagawin ng DTI sa presyo ng mga pangunahing bilihin.

Nasa batas daw kasi na trabaho dapat ng DTI na idetermina kung rasonable ang presyo. Nakalagay sa Price Act na dapat siguruhin ng DTI ang "suggested reasonable price" ng bilihin.

Ayon kay Dimagiba, paano malalaman ng DTI kung lagpas na sa tamang presyo kung wala silang datos na pagbabasehan ng rasonableng presyo?

Dagdag pa ni Dimagiba, inabandona ng DTI ang tungkulin nito na siguruhing rasonable ang presyo.

Paliwanag naman ng DTI, di naman tumataas ang presyo simula nang tinanggal nila ang SRP dahil marami raw brands na nagku-compete.

"We have been saying that prices will be monitored closely pa rin. And look at all basic manufactured products na hindi tumataas kahit hindi covered ng DTI approval," sabi ni DTI Sec. Ramon Lopez sa isang text message.

"Kasi marami brand and players so tight competition. Ang nasa batas ay DTI may from time to time approve SRP," dagdag pa ni Lopez.

Ayon pa kay Lopez, may SRP pa rin pero ang mga pribadong manufacturer na ang magtatakda nito at hindi ang DTI.