Push Admin

Mga nagbukas na negosyo habang Alert Level 3 sa Cavite umaasang makababawi

Article (news)

ABS-CBN News

CAVITE — Balik-operasyon na nitong Miyerkoles ang mga gym at massage parlor sa isang mall sa lungsod ng Imus matapos isailalim ng pamahalaan ang lalawigang ito sa COVID-19 Alert Level 3.Maaga pa lang, nakapila na ang mga customer na gustong magpamasahe sa isang spa.Nakasuot ng kumpletong personal protective equipment ang nagmamasahe, habang nakadamit naman ang minamasahe.Sa isang gym naman, matumal pa ang dating ng mga customer.Umaasa ang fitness instructor na si Ivan Hiponia na magtutuloy-tuloy na ang operasyon ng mga gym na isa sa mga negosyong pinaka-pinadapa ng pandemya.“Walang kasiguraduhan ang isang fitness trainer sa ganitong sitwasyon,” ani Hiponia ng Fitness Quest Gym and Wall Climbing Center.“Mahirap talaga kasi…hindi natin alam kung kailan magsisimula o kailan magsasarado uli,” dagdag niya.Marami na rin ang mga nagpapa-salon ngayong itinaas ang kapasidad ng puwedeng tanggapin na customer.Ayon sa cashier ng Dang Cristal Salon na si Grace Mangulabnan, napilitan ang pamunan ng salon na isara at ibenta ang isa nitong extension dahil sa pagkalugi ngayong pandemya.“Malaki ang bayad (sa) puwesto namin, pero hindi kinakaya ng kita ng salon. Dati dalawa ito eh. Ngayon, ‘yung isa, nabitawan na kasi nga hindi na kayang bayaran,” ani Mangulabnan.Nagbukas na rin uli ang mga computer shop bagama&#x27;t matumal pa rin ang dating ng mga customer dahil karamihan ng mga nagre-renta dati ay mga estudyante.Naglabas ng desisyon ang Malacañang nitong Martes para isailalim sa Alert Level 3 ang Cavite, ganon din ang Laguna, Rizal, Siquijor, Davao City, at Davao del Norte.Sakop na rin ng alert system ang 13 iba pang lalawigan.Sa ilalim ng bagong alert level system, papayagan ang indoor dining sa 10 porsiyentong venue capacity sa Level 4, 30 porsiyento sa Level 3, 50 porsiyento sa Level 2, at 100 porsiyento sa Level 1, pero para lamang sa mga fully vaccinated na customer.Parehong kapasidad din ang ipatutupad sa mga sumusunod:<ul>	<li>Indoor fitness studio, gym at venue ng contact sports</li>	<li>Mga social event gaya ng birthday party at wedding reception</li>	<li>Meetings, incentives, conferences at exhibitions</li>	<li>Theme parks at arcades</li>	<li>Personal care establishments gaya ng barbershop at mga salon</li></ul>Pagdating naman sa outdoor dining at iba pang mga outdoor na establisyimento, 30 porsiyento ang venue capacity sa Level 4, 50 porsiyento sa Level 3, 70 porsiyento sa Level 2, at 100 porsiyento sa Level 1, ano man ang vaccination status ng kostumer.Aminado ang mall supervisor na si Joecris Hernandez ng Lotus Mall na nakabibigla ang desisyon ng pamahalaan, pero mas mainam na rin daw ito para mapalakas ang negosyo.“Medyo nakakagulat kasi biglaan,” saad ni Hernandez. “Sana, magtuloy-tuloy na ang negosyo. We’re expecting naman na habang bumababa ang cases, tataas naman ang pagne-negosyo.”<div>-- Ulat ni Michael Delizo, ABS-CBN News</div>KAUGNAY NA VIDEO: [PLS EMBED: https://www.youtube.com/watch?v=8742VQekTdU]

Balik-operasyon na nitong Miyerkoles ang mga gym at massage parlor sa isang mall sa Imus, Cavite matapos isailalim ng pamahalaan ang lalawiga sa COVID-19 Alert Level 3.