MANILA -- Napuno ng kilig ang "Magandang Buhay" sa pagbisita ng love team na "Joshlia" nila Joshua Garcia at Julia Barretto.

Nitong Lunes, maliban sa pagbabalik tanaw kung paano nagsimula ang kanilang pagiging malapit sa isa't isa, ipinaliwanag din nila ang kanilang espesyal na tawagan.

Ayon kay Joshua, "Golden Girl" ang tawag niya kay Julia dahil para itong yaman na kanyang iniingatan.

"Kaya Golden Girl kasi gold siya para sa akin and tini-treasure ko siya sa chest, sa chest ko," ani Joshua.

Para naman kay Julia, "Brave One" ang tawag niya kay Joshua dahil sa tapang nito na ipakita ang nararamdaman.

"Very unafraid siya to express his feelings and brave siya kasi ginagawa niya 'yung mga bagay na gusto niyang iparamdam sa iyo. At pinaka-gusto ko doon is he is so brave enough to do those things without expecting anything in return," ani Julia.

Nang tanungin kung ano ba ang estado ng kanilang relasyon, sinabi ni Joshua na sa ngayon ay isang magandang pagkakaibigan lang ang mayroon sila.

"Mayroon kaming isang magandang friendship. Totoo ang ganda at ayaw kong masira 'yon. Sobrang importante sa akin nito. At saka hindi importante kung hindi kayo, ang importante ay masaya kayo. Nakikita ko naman na masaya kami at tulungan pa kami sa lahat ng bagay," ani Joshua.

"Friendship is the best foundation para sa relationship," dagdag ng aktor na nagpapasalamat na dumating sa buhay niya ang aktres.

Unang nagkasama ang dalawa para sa pelikulang "Vince & Kath & James."