EXpecially for You: Lalaki, napamahal sa kakambal ng nililigawan

Isang lalaki ang napamahal sa kakambal ng kanyang nililigawan sa latest episode ng "It's Showtime" nitong Miyerkules. 

Kwento ng magkambal na sina Rizza at Rizza Mae sa "EXpecially For You" segment, unang niligawan si Rizza pero hindi niya masyadong pinapansin ng lalaki.

Laging nakakasama ng lalaki si Rizza Mae kaya naman napamahal na siya sa nanliligaw.

"Ayun po 'yung pinakamalaking pagkakamaling ginawa ko sa kapatid ko, 'yung 'di ko inamin sa kanya na may namamagitan na sa amin ni guy," ani Rizza Mae. 

Nalaman na lang ni Rizza na si Rizza Mae na ang gusto ng lalaki sa birthday ng kapatid niya.

"Hindi naman ako magagalit kung gusto niya talaga 'yung guy na 'yun, 'yung nanliligaw sa 'kin. Nagtatampo ako kasi pwede mo namang i-open (up) sa akin," ani Rizza.

"Kung mahal niya talaga, okay lang, magpaparaya ako, basta alam kong ikakasaya niya, okay lang sa 'kin."