Push Admin

ALAMIN: Benepisyo ng mga senior citizen mula sa PhilHealth

Article (news)

ABS-CBN News

<figure class="op-interactive"><iframe allowfullscreen="" frameBorder="0" height="315" src="https://www.youtube.com/embed/vDADSv-mOu0" width="560"></iframe></figure>Kasabay ng pagtanda, dumarami rin ang sakit na maaaring maramdaman ng senior citizens. Bilang tulong sa kanila, mandatory member ng Philippine Health Insurance Corporation (PhilHealth) ang mga may edad 60 pataas sa ilalim ng Expanded Senior Citizens Act of 2010. Ano-ano nga ba ang mga benepisyong maaari nilang makuha mula sa PhilHealth? Sa programang &#x27;Good Vibes&#x27; sa DZMM, tinalakay ni Raymond Acoba, head ng Public Affairs Unit ng PhilHealth, ang mga benepisyo ng senior citizens na miyembro ng PhilHealth. Aniya, iba-iba ang halagang maaaring sagutin ng PhilHealth sakaling madala sa ospital ang pasyenteng edad 60 pataas.Paliwanag ni Acoba, may fixed case rate na sasagutin ang PhilHealth sakaling madala sa pribadong ospital ang pasyente.“Sa private hospital, fixed po ‘yung ating case rate. Halimbawa na-hospitalize siya, pneumonia ‘yung sakit, hanggang P15,000 lamang po kapag pneumonia 1. Kapag pneumonia 2, ‘yung severe case po, up to P32,000,” ani Acoba.Pero paglilinaw ni Acoba, iba pa ang sagot ng PhilHealth sa 20 porsiyentong diskuwento at VAT exemption para sa mga senior citizen.Aniya, kapag dinala sa pribadong ospital ang senior citizen, unang kakaltasin sa babayaran ang VAT at 20 porsiyentong diskuwento at susunod ang benepisyo sa PhilHealth.Kapag naman na-confine sa pampublikong ospital, sakop ng no-balance billing policy ang mga senior citizen na miyembro ng PhilHealth.“Kung sila po ay na-hospitalize sa PhilHealth accredited na public or government hospital, sila ay sakop ngayon ng no-balance billing policy. Ang no-balance billing policy ito po ‘yung wala nang dagdag bayad. Sagot na po ng public hospital ang lahat ng gastusin sa pagpapagamot ng isang senior citizen,” paliwanag ni Acoba.Mayroon ding tinatawag na Z benefits ang PhilHealth para sa mga miyembro nito. Saklaw ng benepisyong ito ang sakit na nangangailangan ng mahabang gamutan. Ngunit sa ngayon ay sa iilang ospital pa lamang ito matatanggap.“‘Yung type Z benefits po natin, ito po ‘yung mga catastrophic cases na nangangailangan ng mahabang pagamutan so malaki po ‘yung benepisyo na binibigya po natin pero selected pa lang po ‘yung mga hospitals na ito,” ayon kay Acoba.Nilinaw naman ni Acoba na iyong mga na-confine lamang sa ospital sa loob ng 24 oras at higit pa ang sagot ng PhilHealth. Aniya, iilang serbisyo pa lamang kasi ang sakop ng kanilang outpatient benefits. Paano magiging miyembro ng PhilHealth ang mga senior citizen?Bagaman mandatory na miyembro ng PhilHealth ang mga senior citizens, sinabi ni Acoba na kailangan pa rin nilang magparehistro upang matanggap ang mga benepisyo.“Sinabi doon sa batas na automatic member ang mga senior citizen pero may isa lang kaming requirement. Dapat magpa-register sila para mabigyan namin sila ng member data record and PhilHealth card para kapag ma-hospitalize sila, tuloy-tuloy na ang pagbibigay ng PhilHealth benefit,” ani Acoba.Maaaring pumunta sa Office for the Senior Citizens Affairs (OSCA) sa mga lokal na pamahalaan upang magparehistro. Kailangan lamang ng valid ID at mag-fill out ng dalawang kopya ng PhilHealth member registration form, at ipasa ito.Matapos ito, hintayin ang member data record at PhilHealth identification card na ibibigay sa pamamagitan ng OSCA.Ayon kay Acoba, maaari ring magparehistro sa mga PhilHealth Local Health Insurance Office o sa PhilHealth Express na makikita sa mga mall.

Ano-ano nga ba ang mga benepisyong maaaring makuha ng senior citizens mula sa PhilHealth?

Ano-ano nga ba ang mga benepisyong maaaring makuha ng senior citizens mula sa PhilHealth?