Watch more in iWantv or TFC.tv

Ano nga ba ang silbi ng appendix sa katawan ng isang tao?

Ayon kay Dr. Jade Jamias, isang gastroenterologist, may mga pag-aaral nang nagpapakitang may katuturan ang appendix sa katawan, taliwas sa dating paniniwalang "vestigial organ" o walang silbi ang nasabing organ.

"Sinasabi nating it's a vestigial organ but recently... May mga pag-aaral na sinasabing it's a storage house daw ng good bacteria," ani Jamias sa "Good Vibes."

"Halimbawa, ikaw daw ay nagdudumi o (nakakaranas ng) pagtatae, siya daw ang nagsu-supply ng good bacteria to reboot 'no... parang sa computer, 'yung population ng good bacteria sa large intestine," dagdag niya.

Karaniwang remedyo sa karamdamang appendicitis o ang pamamaga ng appendix ay ang pagtanggal nito mula sa katawan.

Pero tiniyak ni Jamias na walang epekto sa katawan ang pagtanggal ng appendix. Ang mawawala lang aniya ay ang kapasidad ng appendix na bumuo o magtago ng mabubuting bacteria sa katawan.

"Kahit matanggal siya it's not something that is essential to life. Puwede siyang mawala pero itong function na magbibigay ng good bacteria mawawala," aniya.

Kasama sa sintomas ng appendicitis ang pagkakaroon ng pananakit sa bandang gitna ng tiyan at lilipat daw ang pananakit sa ibabang-kanang bahagi ng tiyan, kung saan matatagpuan ang appendix.

Maaari ring magsuka ang pasyente at mawalan ng gana tuwing kumakain. Lalagnatin din daw ang pasyente at maaaring makaramdam ng diarrhea, constipation, o kaya bloating.