3 sasakyang pandagat mula China, di pinayagang makadaong sa Dumaguete

Hindi pinayagang makadaong sa pantalan ng Dumaguete City sa Negros Oriental ang isang tugboat at 2 barge na mula pa sa bansang China dahil sa banta ng pagkalat ng novel coronavirus o 2019-nCoV.

Ayon sa Bureau of Customs at Philippine Coast Guard, dumating sa Dumaguete City ang mga sasakyang pandagat Martes ng hapon pero hindi pinababa ang 11 Pilipinong crew members nito dahil kailangan pa silang sumailalim sa 14-day quarantine period.

Hinihintay pa ang quarantine officer at ilang miyembro ng coast guard para puntahan ang nasabing mga sea vessels para matingnan ang kondisyon at masimulan ang quarantine ng mga Pinoy.

Ang crew members ang pumunta ng China para bilhin ang sea vessels na ito.

Sinabi naman ni Dumaguete Mayor Felipe Remollo na hindi niya papayagan na bumaba sa port ang mga crew at dumiretso sa Leyte na kanilang port of destination.

Samantala, pinaigting ngayon ng Port Administration ang pag-scan ng body temperature ng lahat ng mga dumadating na pasahero sa port para masigurong wala silang lagnat at iba pang nararamdaman na sakit. Ito ay precautionary measures sa gitna ng pangamba na mahawaan ng novel corona virus-acute respiratory disease.