Ilog ng Montible, posibleng mapagkunan ng malinis na tubig sa Puerto Princesa

PUERTO PRINCESA – Limang taon nang iminumungkahi ng Puerto Princesa Water District na payagan ito ng Iwahig Prison and Penal Farm na makakuha ng malinis na tubig sa ilog ng Montible.

Ang panukala ng Puerto Princesa ay maaari lang maisakatuparan kung maaaprubahan ng Bureau of Corrections (BuCor), pero hanggang sa ngayon ay tila nahihirapan pa rin sila umanong mapapayag ang BuCor.

Ayon sa Water District, hindi umano nila mabitawan ang hangaring makuha ang Montible River bilang isa sa mapagkukuhanan ng tubig dahil hindi ito umano natutuyuan ng tubig, at ayon sa kanilang pag-aaral ay madali itong mapuntahan lalo na ng mga residente ng mga barangay sa poblacion.

Napapanahon na rin umano na maghanap ng panibagong pangunahing mapagkukunan ng tubig sa lungsod, dahil taong 2015 pa lang ay nagkukulang ang naiipong tubig sa Kampo Uno Dam, malayo sa inaasahan nilang 2018 pa bababa ang tubig doon.

Ayon sa Water District, kahit naging sapat pa ang supply ng tubig sa Kampo Uno Dam, na nakakapagbigay ng 600m3/hr na tubig, sa Marso umano ay bababaan ang tubig na ibibigay sa lungsod.

Sa oras na magkulang ang tubig, back-up umano ang 40 balon o deep well sa lugar.

Magpupulong ang pamunuan ng Water District at BuCor upang muling mapag-usapan ang mungkahi na magamit ang tubig sa ilog ng Montible.