1 taong gulang ginahasa umano ng 18 anyos na pinsan sa CDO

CAGAYAN DE ORO CITY - Arestado ang isang 18 taong gulang na lalaki matapos akusahang nanggahasa ng isang taong gulang na batang babae.

Ang biktima ay pinsan ng suspek na ilang linggo pa lamang na nakitira sa kanilang bahay.

Sa imbestigasyon ng pulisya, Martes ng hapon nakiusap sa suspek ang nanay ng bata na bantayan ito dahil bibili siya ng gamot sa tindahan.

"Nang nakabalik sa bahay ang nanay paglipas ng isang oras, walang tigil na sa kakaiyak ang kaniyang anak at nakita niyang dumudugo ang pribadong parte ng bata," sabi ni Patrolwoman Jennifer Husayan, ng Women and Children Protection Desk ng Cagayan de Oro City Police Station 2.

Hinihintay ngayon ng pulisya ang resulta ng medical examination ng bata.

Aminado naman ang suspek na ginalaw niya ang batang pinsan.

"Hindi ko alam kung bakit ko iyon nagawa. Nakokonsenya ako. Wala ako sa wastong pag-iisip," sabi ng suspek.

Sinampahan na ng kasong rape at paglabag sa Republic Act 7610 o Special Protection Against Child Abuse, Exploitation and Discrimination ang suspek.