OFW na namatay sa bugbog, inilibing na

Inilibing Sabado ng hapon sa Himlayang Pilipino ang overseas Filipino worker na si Abigail Gino Basas na namatay sa pambubugbog noong nakaraang linggo sa Quezon City.

Dumagsa ang mga kaibigan at kaanak ni Basas na suot ang puting t-shirt na may litrato ng biktima para ihatid ang mga labi ng biktima sa kanyang huling himlayan.

Photographer sa isang cruise ship si Basas na umuwi noong February 11 para magbakasyon sa Pilipinas, ngunit namatay nang kuyugin at bugbugin ng ilang lalaki sa Tomas Morato, Quezon City.

Patuloy na hinahanap ng mga pulis ang mga suspek.

Noong Huwebes lumantad ang ilang babae na kasama umano ng mga nambugbog at nakapatay kay Basas, at nagpahayag na makipagtulungan sa pulisya para mahuli ang mga may sala.

Pero giit ng ama ni Basas, dapat ding kasuhan ang babae na maaaring sangkot sa pagkamatay ng kanyang anak.