Ilang residente sugatan sa pagsiklab ng sunog sa Makati

MANILA (UPDATED) - Ilang residente ang nasugatan nang sumiklab ang sunog sa isang bahagi ng Makati, Biyernes ng umaga.

Ayon sa mga awtoridad, mabilis na kumalat ang apoy dahil gawa sa mga light material ang magkakadikit na bahay sa kanto ng Gen. Malvar Street at Gen. Mascardo Street.

Bandang alas-10 ng umaga ay kontrolado na ng mga bombero ang apoy, na patuloy nilang inaapula.

Hindi pa natutukoy ng mga kinauukulan ang sanhi ng apoy.

Pasado alas-6 ng umaga nang makita ng mga motorista ang paglabas ng maitim na usok mula sa Barangay Bangkal.

Iniakyat sa ikatlong alarma ang sunog wala pang 20 minuto matapos itong magsimula, ayon sa mga awtoridad.

Tatlong substation ng Bureau of Fire Protection ang kinailangang rumesponde sa sunog.