Jeep nabundol ng SUV, tumaob sa Commonwealth Avenue

MAYNILA - Bumaligtad ang isang jeep matapos umano itong tumbukin ng isang SUV sa Commonwealth Avenue, Quezon City, Linggo ng hapon.

Bukod sa jeep na may sakay na 7 pasahero, una na palang nabangga ng SUV ang isang bisikleta sa may parking lot ng Diliman Preparatory School, ayon sa imbestigasyon ng pulisya.

Agad namang naisugod sa East Avenue Hospital ang mga nasaktang pasahero ng jeep, gayundin ang sakay ng nabanggang bisikleta.

Giit naman ng drayber ng SUV, mabagal lang ang patakbo niya ng sasakyan, pero taliwas dito ang sinabi ng mga nakasaksi. Patuloy ang imbestigasyon ng mga awtoridad sa aksidente.