Lalaki sinaksak ng kaibigan dahil sa kalasingan

CALABANGA, Camarines Sur – Sugatan ang isang lalaki matapos itong saksakin ng kaniyang matalik na kaibigan dahil sa sobrang kalasingan nitong Sabado ng gabi sa Barangay San Roque, Calabanga, Camarines Sur.

Base sa imbestigasyon, nag-iinuman ang biktimang si Ruben Palma at ang suspek na si Jack Sola.

Nagkapikunan umano ang dalawa at dahil sa kalasingan, sinaksak ni Sola si Palma.

Depensa naman ni Sola, babatuhin umano siya ni Palma kaya dinepensahan niya ang kaniyang sarili.

Nagpapagaling ngayon sa Bicol Medical Center si Palma dahil sa tinamong saksak sa tiyan.

Kuwento naman ng driver ng motorsiklo na naghatid sa biktima sa pulis, bago umalis sa lugar ay nag-fist bump pa ang magkaibigan.

Agad namang sumuko si Sola sa pulisya at na-inquest na nitong Linggo.

Nais niyang mapatawad siya ng kaibigan at iurong ang kaso.