Watch more in iWantv or TFC.tv

Matapos magtago ng limang taon, naaresto ng National Bureau of Investigation (NBI) ang isang lalaking nanggahasa umano sa kaniyang noon ay 13 anyos na kapitbahay.

Hinuli ng mga tauhan ng NBI sa isang operasyon sa Bacoor, Cavite ang suspek na si Eranio Solomon, na limang taong nagtago matapos umanong halayin ang biktimang si alyas "Cathy."

"Hinubaran niya ako. Tinutukan niya ako ng kutsilyo. Sabi niya sa akin papatayin niya ako kung magsusumbong ako,” kuwento ni Cathy.

Bukod sa panghahalay, ilang beses ding sinundan ng suspek ang biktima sa paaralan nito.

Katuwiran naman ni Solomon, nahalay niya ang biktima dahil sa kalasingan.

“Lasing po ako noon, hindi ko sinasadya," anang suspek.

Kuwento pa ng ina, pinagtangkaan at sinuhulan sila ng suspek para hindi magsumbong sa mga awtoridad.

“Inalukan nila kami ng tatlong milyon para iatras ang kaso, nagsabi pa sila na makakawala rin siya kasi malakas silang Iglesia sa NBI,” sabi ng ina ng biktima.

Nagbabala naman si Dennis Syihian, pinuno ng NBI Anti-Organized and Transnational Crime division, na huwag basta-basta iwanan ng mga magulang ang kanilang mga anak.

"Siguradong alamin kung sinong kausap at lumalapit sa kanila. Iyan kasi yung edad na napaka-vulnerable," aniya.

Inaalam ng NBI kung paano nakapagtago at nakatanggap ng trabaho si Solomon kahit may ihinain na arrest warrant laban sa kaniya.

-- Ulat ni Niko Baua, ABS-CBN News