MAYNILA — Sugatan ang 2 construction worker sa aksidente sa isang itinatayong gusali sa Bacood sa Sta. Mesa, Maynila nitong Huwebes ng hapon.

Kuwento ng construction workers na sina Darwing Rubiales at Ryan Asibis, halos 3 linggo na silang gumagawa sa lugar nang bigla na lang bumagsak ang lumang pader sa kanilang pinagtatrabahuhan.

“Naghuhukay sa baba, tapos hindi namin alam na bumabagsak pala 'yung pader na 'yun. Nabagsakan 'yung dalawa,” sabi ni Asibis.

Nasa 9 anila sila noon sa construction site nang mangyari ang aksidente at 2 sa kanilang kasamahan ang nasaktan, na agad din namang na-rescue ng mga rumespondeng rescue team.

Nakilala ang mga biktima na sina Clarence Bautista at John Paul Ricafort na dinala na sa ospital. Mula sa Mabitak, Laguna ang grupo ng mga construction worker at dumayo pa sa Maynila para magtrabaho.

“May tumawag na concerned citizen at nagmalasakit na may nalaglagan na gumuhong adobe, tiningnan po natin ano nga po nadaganan... 'Yung isa po ay nawalan ng malay nang 2 minutes, 'yung isa po bale fractured po 'yung kanyang balikat,” ani chairman Ludwig Solano ng Barangay 617.

May building permit aniya ang may-ari ng itinatayong bahay.

Sa ngayon, ayon sa mga construction worker, pansamantalang tigil muna ang kanilang trabaho base na rin sa abiso ng kanilang foreman at ng may-ari ng gusali.

IBA PANG ULAT

Watch more News on iWantTFC