VIRAL: Mag-aaral, binugbog ng mga kapwa estudyante

MANILA - Kumalat sa social media ang video ng mga babaeng estudyante na nambugbog ng kapwa nila mag-aaral sa Quezon City.

Makikita rito ang isang babaeng estudyante na biglang sinabunutan ng kanyang kasama habang nasa Neopolitan Business Park.

Nang matumba, pinagtulungan siyang hampasin at tadyakan ng dalawang iba pang mga babae.

May mahigit 100,000 shares at nasa apat na milyong views na sa social media ang video.

Ayon sa principal ng Lagro High School na si Dr. Noemi Moncada, ang sinaktang estudyante ay galing sa Maligaya High School.

Tatlo sa limang nambugbug sa biktima ay mula anya sa Lagro High School at sinuspinde ng tatlong araw.

Naghain na rin ang paaralan ng recommendation for expulsion sa Department of Education (DepEd) laban sa tatlong estudyante nito.

Pinayuhan naman ng Lagro High School ang magulang ng biktima na ipa-barangay ang dalawa pang sangkot na hindi nila estudyante.