Watch more in iWantv or TFC.tv

MAYNILA - Sinampahan na ng kasong robbery ang apat na pulis ng Valenzuela City matapos mahuli umanong nangongotong sa mga junk shop sa lungsod.

• 3 pulis-Valenzuela, huli sa 'pangongotong' sa mga junk shop

Kinasuhan sina SPO4 Seraffin Adante, PO1 Ryan Paul Antimaro, at PO1 Rey Harvey Florano na nakatalaga sa Police Community Precinct (PCP) 8 ng Valenzuela City police.

Damay rin sa kaso ang PCP 8 Commander Senior Insp. Adonis Paul Escamillan na hindi kasama sa mga nahuli ng Philippine National Police-Counter Intelligence Task Force (PNP-CITF) sa entrapment operation nitong Martes.

Ang kasong isinampa sa Department of Justice ay base sa reklamo ng may-ari ng junk shop na si Danilo Balar. Aniya, gabi-gabi umanong iniikutan ng mga pulis ang mga junk shop para kolektahan ng P200 hanggang P500.

Ayon kay Assistant State Prosecutor Love–rhette Villordon, hindi na nagsumite ng counter-affidavit ang mga suspek kaya't mabilis na maihahain ang kaso sa korte.

-- May ulat ni Maan Macapagal, ABS-CBN News