MANILA - Nasagip ng mga awtoridad Linggo ang tatlong hiker na napaulat na nawawala sa Mount Pico de Loro sa Cavite nitong Sabado.

Naligaw ang hikers na sina John Carlo Molino, 25; Mark Stephen Fernandes, 26; at Jan Jerome Vicedo, 23, dakong alas-2:30 Sabado ng hapon.

Naghanap ang tatlo ng daan para maligo sa ilog, pero hindi na nakabalik sa trail, ayon kay Marie Belle Igmat, superintendent ng Mounts Palay-Palay-Mataas-na-Gulod Protected Landscape.

Na-contact naman ng grupo ang ilang kaibigan sa Maynila, na nag-ulat ng kanilang pagkawala sa Department of Environment and Natural Resources (DENR).

Pansamantalang ipinagbawal ang pag-akyat sa bundok kahapon upang hindi maabala ang search and rescue operation sa tatlo.

Pasado alas-6 Linggo ng umaga nakita ang mga mawawalang hiker sa bahagi ng bundok na hindi madalas napupuntahan ng mga mountaineer.

Nakauwi na sila habang nagbalik-normal na rin ang mga aktibidad sa bundok.

Ipinaalala ng awtoridad sa publiko na maging responsable at sumunod sa mga regulasyon upang maiwasan ang kaparehong insidente.