2 menor de edad nalunod sa Pangasinan

AGNO, Pangasinan - Dalawang menor de edad ang magkasunod na nalunod sa karagatan sa Barangay Macaboboni sa bayang ito Biyernes.

Unang naging biktima ang 10 taong gulang na si Karl Martin Valdez na taga Antipolo.

Sinubukan siyang isalba ng mga residente nang makitang nalulunod. Dinala siya sa ospital pero idineklara ring dead on arrival.

Makalipas ang ilang minuto, ang 14 taong gulang na si John Paul Corilla naman ang nalunod.

Ayon sa kaniyang pamilya, wala silang ideya sa nangyari kaya't agad na dumiretso sa dagat ang biktima.

Ikinasasama rin ng loob ng pamilya Corilla ang matagal na pagrescue sa binatilyo.

Ayon sa kapatid ng biktima, pinanood lang umano ng mga tao sa resort ang insidente.

"Wala man lang tumulong, pinapanood lang nila tapos 'yung mga may bangka, ang dami daming bangka hindi ginamit dahil hindi daw sa kanila 'yun," aniya.

Ayon naman sa opisyal ng barangay, hindi sila nagkulang sa pagpapaalala sa publiko na malakas ang alon.

Pero aminado sila na walang ipinatutupad na mga patakaran sa naturang dalampasigan.

"Wala pa pong ipinatutupad dito kasi 'yung ipinasa po namin na mga rules ay inihi-hearing pa sa Sangguniang Bayan," paliwanag ni Kagawad Lourdes Braganaza.

Pinag-iisipan pa ng pamilya Corilla kung magsasampa sila ng reklamo sa tinuluyang resort.