Watch more in iWantv or TFC.tv

Ang panahon ng Kapaskuhan ay panahon rin ng pamimili ng mga panregalo sa mga kaibigan at mahal sa buhay.

Pero sa mga pagkakataong kailangan ibalik ang isang depektibong produkto, may ilang pamilihan na nagpapairal ng polisiyang "no return, no exchange."

Legal nga ba ito?

Ayon sa isang opisyal ng Department of Trade and Industry (DTI), may karapatan ang isang konsumer na magbalik ng produkto lalo na kung natuklasan lang niya ang sira nito matapos bilhin.

Alinsunod ito sa sa Republic Act 7394 o "Consumer Act of the Philippines."

"Nakita ng konsumer na may defect [ang produkto], ayun po dapat isaalang-alang ng retailer," ani DTI Mediation Division chief Perpetua Werlina Lim sa "Usapang de Campanilla" ng DZMM nitong Miyerkoles.

Pero paglilinaw niya, may karapatan ang mga tindahan ang pagbalik kung mapapatunayan nilang may "change of mind" o nagbago lang ang isip ng kostumer.

"Ang 'no return no exchange policy' na sinasabi nila ay [naaangkop] lang 'pag change of mind lang," aniya.

Nanawagan naman si Lim na dapat kilatisin nang mabuti ang produkto bago ito bilhin para maiwasan ang perwisyo.