Push Admin

Lalaki sinaksak dahil umano sa away sa sukli

Article (news)

Karen De Guzman

ABS-CBN News

Patay sa pananaksak ng tindero ng mangga ang isang lalaki sa Barangay 698, Malate, Maynila nitong Sabado. Nakuhanan ng CCTV ang pagtatalo ng dalawang lalaki sa tapat ng isang tindahan nang biglang dumampot ng patalim ang tindero at saka inundayan ng saksak ang biktima. “Parang pino-provoke niya ‘yung tindero tapos suddenly, may kinuha siyang kutsilyo then nilapitan niya,” ayon kay Olivia Agustin, barangay tanod. Nakatakbo pa papalayo ang biktima habang tinitingnan ang mga tama ng saksak sa katawan. Sumakay ito ng tricycle bago tuluyang naalalayan ng ilang tao sa lugar. Nakita naman sa CCTV ang pagtakas ng suspek patungo sa may kalye ng Remedios. Sa imbestigasyon ng pulisya, alitan umano sa sukli ang dahilan ng pananaksak. “Parang nag-away ito sa sukli lang. Hindi nila ma-ascertain lang kung ano mismo ‘yung pinag-awayan sa sukli,” ayon kay PCpt. Dennis Turla, hepe ng Homicide-MPD. Tatlong tama ng saksak sa dibdib at tagiliran ang tinamo ng biktima na kinilalang isang kitchen staff o chef na nagtatrabaho sa lugar. Naisugod pa ito sa ospital pero binawian din ng buhay.  “Ang nakita nila is parang isang kitchen knife pero kasi nung tumakas itong suspek natin, dala-dala niya itong pananaksak na ginamit niya,” sabi ni PCpt. Turla. Nalag-alaman namang isang taon nang nagbebenta sa lugar ang naturang tindero na kakilala rin ng biktima.“Magkakilala talaga sila. At meron kaming napag-alaman na madalas binibiro nitong chef si suspek. Hindi natin alam kung bakit humantong sa ganung pangyayari ‘yung kanilang pagtatalo sa sukli lamang,” dagdag ni PCpt. Turla.Magmula nang mangyari ang insidente, hindi pa muling nagpapakita ang tindero sa lugar. “Sabi po nung kapatid niya, nung nalaman niya ‘yun, nagsabi naman siya na isusuko niya ‘yung kapatid niya,” sabi ni Agustin.“Mostly naman po ‘yung ganyang insidente, hindi taga-rito dahil syempre ‘yung area namin, business area siya kaya mostly lahat ng nasa kalye namin, hindi namin residente,”  dagdag ni Agustin. Tinutugis na ngayon ng pulisya ang nakatakas na suspek at inihahanda na rin ang reklamong murder laban dito.

Patay sa pananaksak ng tindero ng mangga ang isang lalaki sa Barangay 698, Malate, Maynila nitong Sabado.

Patay sa pananaksak ng tindero ng mangga ang isang lalaki sa Barangay 698, Malate, Maynila nitong Sabado.