Arestado ang isang security guard matapos gahasain ang kanyang menor de edad na anak sa Quezon City Lunes ng madaling araw.

Ayon kay Police Lieutenant Colonel Ferdinand Casiano, station commander ng QCPD Station 9, dumulog sa kanilang istasyon ang kaanak ng 16-anyos na biktima kaya agad silang nagkasa ng hot pursuit operation.

Inaresto ang suspek sa pinapasukang trabaho sa Araneta Avenue sa Quezon City.

“Nagreport po sa atin dito ang kanyang magulang kasama po ang menor de edad na anak na allegedly biktima po ng panggagahasa. Accordingly, nakainom po siya nung ginahasa po niya ang kanyang anak na wala po during that time ang kanyang nanay,” sabi ni Casiano.

Aminado naman ang suspek sa nagawang krimen.

Dati na rin siyang nakulong dahil sa kasong serious physical injuries.

“Humihingi po ako ng pasensya sa pamilya ng aking asawa saka sa pamilya ko pasensya sa anak ko sa nagawa kong mali. Sobrang pagsisisi ko kung bibigyan ako ng pagkakataon babawi ako nang sobra-sobra," sabi ng suspek.

Nakakulong ngayon sa Anonas Police Station ang suspek na nahaharap sa reklamong statutory rape.