Lalaki binaril sa labas ng sari-sari store sa Caloocan

Patay ang isang 36-anyos na lalaki matapos pagbabarilin sa Barangay 176 sa Bagong Silang Caloocan, alas dos ng hapon nitong Miyerkoles.

Sa kuha ng CCTV, nahagip ang pagdaan ng isang motorsiklo kasunod ang duguang biktima na tila hinahabol ang motorsiklo. 

Sa isa pang anggulo ng CCTV, makikitang tumatakbo pa ang biktima pero bigla siyang bumulagta.

Ayon kay Tranquilino Castillo Jr., purok leader sa lugar, nakita ng ilang residente na pinagbabaril ang biktima sa labas ng isang sari-sari store.

“Nakarinig sila ng ilang putok tapos 'yun nakita nila tumakbo na 'yung tao tapos doon na bumulagta,” sabi ni Castillo.

Naisugod pa sa ospital ang biktima pero idineklarang dead on arrival bunsod ng mga tama ng bala sa iba’t ibang bahagi ng katawan.

Sa inisyal na imbestigasyon ng pulisya, posibleng ang rider ng motorsiklo ang responsable sa pamamaril.

Ayon kay Police Captain Joniber Blasco, commander ng Caloocan Police Sub-station 13, tinutugis na nila ang salarin habang iniimbestigahan ang motibo sa pamamaril.

“As of now ang ginagawa namin continuous investigation pa rin kami and follow up operation for the identification of suspect and back tracking of CCTV. Sa ngayon marami kaming anggulo tinitingnan,” sabi niya.

Blangko rin ang kaanak ng biktima sa posibleng motibo sa krimen.

Nananawagan sila ng hustisya.

“Sa akin masakit talaga dahil hindi ko tanggap anak ko mauuna sa akin. Hindi ko tanggap talaga nangyari sa anak ko dahil ang sakit sa akin nung nakita ko itsura ng anak ko. Sa akin lang ang ano ko lang makamit ng hustisya ang anak ko,” ayon sa ina ng biktima.