Maria Virginia Sy

Halos 100 bahay, natupok ng sunog sa Parola Compound; 200 pamilya, nawalan ng tirahan

Article (news)

Bea Cuadra

ABS-CBN News

Nasa 100 bahay ang natupok ng apoy sa sunog sa Gate 10 hanggang 12 ng Parola Compound sa Barangay 20, Tondo, Maynila, madaling araw nitong Biyernes, Marso 6. Dahil sa bilis ng pagkalat ng apoy, umabot ito sa ika-apat na alarma. Rumesponde ang 14 na trak ng bumbero mula sa BFP at mahigit 60 fire volunteers para tulungang apulahin ang sunog. Ayon kay Barangay Captain Anthony Igus, sa second floor ng isang unit nagmula ang apoy. “Yung tao na alyas Toto nagsunog ata sa second floor kasi tinanong ko yung mga tao mga kapitbahay diyan dun nagsimula ang sunog… sa ngayon, hinahanap pa namin ngayon &#x27;yung tao,” kwento ni Kapitan Igus. Ito rin ang hinala ng residenteng si Jackquelyn Lape. ”Kasi po may nangyari daw po kasi na umaga pa lang daw po may nagsunog na ngayon napigilan po yun gawa po na marami nakakita. Nasimulan daw po uli ng madaling araw. Nagsunog na raw po, kasama &#x27;yung gasul na sinindihan. Lumiyab po &#x27;yun lahat ngayon, di po naapula ng mga tao kasi nagkalat po lahat.” Base sa datos mula sa Barangay 20, nasa 100 istraktura ang nasira, kung saan apektado ang nasa 200 pamilya o humigit-kumulang 600 na indibidwal. Sa tindi ng apoy, maraming residente ang walang naisalbang kagamitan, gaya ni Salve Ausa na nanonood lamang ng pelikula nang magsimula ang sunog. “May naririnig po ako sumisigaw na may sunog daw po kinakalabog na… Pagbaba po namin, &#x27;yung sunog malapit na samin kaya hindi na kami nakapagsalba ng kahit anong gamit. Wala po kami naisalba maliban lang sa mga anak ko,” ani Salve. Ayon kay Fire Senior Inspector Ronald S. Lim, Station 1 Commander, nahirapan ang mga bumbero dahil sa sikip ng lugar. “Light material siya then mga eski-eskinita so nag adjust po tayo. Nagtaas po tayo ng alarma para mabilis po &#x27;yung takbo ng ating BFP tsaka ating mga kaibigan sa volunteers. Then natulungan po siya, may hydrant po tayo sa kabila so hindi na po siya masyado kumalat,” paliwanag ni Lim. Tinatayang nasa ₱400,000 ang halaga ng pinsala sa ari-arian. Sa ngayon, patuloy pa ang imbestigasyon ng BFP sa tunay na sanhi ng apoy. Nag-iwan din ng paalala ang opisyal ngayong Fire Prevention Month. “Maging maingat sa sunog lalo ngayong Marso papasok ang summer. Lagi po nating i check ang ating mga kuryente and &#x27;yung ating kusina… Lalo ang ating LPG, lagi natin itong i che check.” (Production: Bea Cuadra, Nonie Sales, ABS-CBN News)

Nasa 100 bahay ang natupok ng apoy sa sunog sa Gate 10 hanggang 12 ng Parola Compound sa Barangay 20, Tondo, Maynila, madaling araw nitong Biyernes, Marso 6.

Nasa 100 bahay ang natupok ng apoy sa sunog sa Gate 10 hanggang 12 ng Parola Compound sa Barangay 20, Tondo, Maynila, madaling araw nitong Biyernes, Marso 6.