Nelson Morales

Lalaki arestado sa QC matapos bumili ng cellphone gamit ang pekeng pera

Generic thumbnail for jail. Jail thumbnail

Article (news)

Jessie Cruzat

ABS-CBN News

MANILA -- Arestado ang 18-anyos na lalaki matapos mahuli sa entrapment operation ng Police Station 14 ng Quezon City Police District sa Novaliches, madaling araw nitong Lunes.Ayon sa pulisya, una nang naireport ang suspek sa kanilang tanggapan matapos makipag-meet up sa isang online seller at bilihin ang binebentang cellphone gamit ang counterfeit o pekeng pera na nagkakahalaga ng P24,000.“Bigla raw umalis itong suspek na bumili ng cellphone, saka lang napansin no’ng biktima na peke ‘yong pera niya. Mabilis ‘yong pangyayari… Nai-identify nila ‘yon din ang cellphone na galing sa biktima, may tumulong sa kanilang online seller para kunwari bilhin ulit ‘yong cellphone,” sabi ni PLt.Col. Rey Tad-o, hepe ng Holy Spirit Police Station 14-QCPD.Matapos mahuli ang suspek, dumulog sa pulisya ang iba pang online seller na sinasabing nabiktima rin ng lalaki.Isa na rito si alyas Angela na nabilihan umano ng suspek ng gintong singsing na nagkakahalaga ng P16,000.Kwento ni Angela, una niyang naka-transaksyon online ang nagpakilalang pinsan ng suspek na nasundan nang pakikipag-meet up niya sa suspek.“Then, binigay ko sa kanya yung ring. Tapos, chinek niya… pero hindi niya inuri. So, nung pagka-check niya, sabi niya sa akin, ma’am, may tawad pa po ba ito? Pwede pong 15k? Sabi ko, ay, hindi na po,” saad ni Angela.Nalaman na lang ni Angela na peke ang perang nababayad sa kanya nang subukan niya itong ideposito sa bangko.  “So, trinay kong i-deposit dun. And then, kasabay ng iba kong money. And then, nagulat na lang ako, nung kinakaunt na yung pera, biglang binalik lahat sa akin yung 16,000. Saktong-sakto dun sa kung ano yung binayad sa akin. So, alam ko na, yung iba tinanggap, which is yung money na nasa wallet ko na, pero yung 16,000 na binigay sa akin, hindi tinanggap. So, dun ko na na-realize na, okay, fake,” dagdag ni Angela.  Dumulog rin sa pulisya ang online seller na si alyas Anna na binilhan rin umano ng suspek ng alahas na nagkakahalaga ng P18,000.“Ang nangyari, pag-abot ko po no’ng item, binigay niya po sa akin ‘yong bayad. Hindi po agad na-recognize na peke ‘yong pera. Tapos mamaya po, nagmamadali na siya umalis...Magaan sa pakiramdam na nahuli na kasi para hindi na sila makapanghiktima sa susunod,” kwento ni Anna.Depensa ng suspek, napag-utusan lang siya.“Napag-utusan lang ako diyan. Wala na sir. ‘Yong taong di ko nakikita, nautos lang sa akin. Hindi ko alam na fake money ang dala ko. Hindi naman po ako marunong tumingin ng pera. Dala lang ng pangangailangan, sir,” saad ng suspek.Ayon sa pulisya, hindi malayo ang posibilidad na may grupo sa likod ng naturang modus.  Nagpaalala rin sila sa mga online seller na makikipag-transaksyon ng personal sa buyer.“Advise ko lang sa mga seller, kung meron naman silang online din, mas maganda ‘yon basta ipakita ‘yong proof na na-ideposit nila. Kung pera naman ‘yong ibibigay, dapat tingnan nila ‘yong pera lalo’t hindi naman nila kilala ‘yong tao. Mas maganda na bilangan nila sa harap,” dagdag ni Tad-o.Mahaharap ang suspek sa kasong estafa at paglabag sa Revised Penal Code Article 166 o Use of False Treasury or Bank Notes.Samantala, una nang nagpaalala ang Bangko Sentral ng Pilipinas na maging mapanuri sa perang papel upang maiwasan ang ganitong modus.Ayon sa BSP, gawin ang feel, look, and tilt method o salatin, tingnan, at itagilid ang perang papel upang makita ang iba-ibang security features nito tulad ng embossed prints, tactile marks, serial number, security fiber at iba pa.  Kung sakaling nakatanggap ng pekeng pera, agad itong ipagbigay alam sa mga awtoridad o pinakamalapit na opisina ng Bangko Sentral ng Pilipinas para sa karampatang aksyon.

Matapos mahuli ang suspek, dumulog sa pulisya ang iba pang online seller na sinasabing nabiktima rin ng lalaki.

Matapos mahuli ang suspek, dumulog sa pulisya ang iba pang online seller na sinasabing nabiktima rin ng lalaki.