Maria Virginia Sy

Lalaking nakasuot ng PNP uniform at nahulihan ng baril, arestado sa Navotas

Article (news)

Christopher Sitson

ABS-CBN News

Arestado ang 46-anyos na lalaki matapos mahulihan ng baril na walang lisensya sa Barangay Tanza Uno, Navotas City, Linggo ng umaga, Setyembre 14, 2025. Ang suspek ay nakasuot pa ng uniporme ng PNP nang maaresto kahit hindi naman siya pulis. Sa regular patrolling ng Navotas Police sa isang eskinita nasita ang lalaki dahil sa suot-suot niyang pang-itaas na uniporme ng pulis na pinaresan ng shorts. Ayon sa PNP, ito ay improper uniform. “Actually nakaupo siya. Napansin na red flag agad is naka-camouflage siya na green. ‘Yan ‘yung ginagamit ng ating mga mobile forces. Another red flag doon is ‘yung tattoo niya sa left which is visible. ‘Yung mga pulis kasi natin, may tattoo man ‘yan, usually hindi sila naka-expose,” sabi ni Police Colonel Renante Pinuela, officer-In-charge ng Navotas City Police Station. Sa pagtatanong ng pulisya sa lalaki, umamin siyang hindi siya pulis. Dagdag ni PCol. Pinuela, hindi sinabi ng suspek ang dahilan kung bakit siya nakasuot ng police uniform at kung saan niya ito nakuha. Nang kapkapan, nakuha sa kanya ang isang baril na walang lisensya. Napag-alaman na nakulong na noong 2016 ang suspek dahil sa iligal na droga. “Nasintensyahan siya ng four years, noong 2021 siya nakalaya. We’ve also found out na mayroon siyang isa pang pending warrant of arrest for Anti-Loitering doon sa may Malabon court naman,” pahayag ni PCol. Pinuela. Isinailalim na sa ballistic examination ang nakumpiskang baril para malaman kung nagamit na ba ito sa krimen. Tumanggi nang magbigay ng pahayag ang suspek. Nakakulong na sa Bureau of Jail Management and Penology (BJMP) ang suspek na nahaharap sa mga reklamong paglabag sa Article 179 ng Revised Penal Code o Illegal Use of Uniform or Insignia at Republic Act 10591 o Comprehensive Firearms and Ammunition Regulation Act.

Arestado ang 46-anyos na lalaki matapos mahulihan ng baril na walang lisensya sa Barangay Tanza Uno, Navotas City, Linggo ng umaga, Setyembre 14, 2025.

Arestado ang 46-anyos na lalaki matapos mahulihan ng baril na walang lisensya sa Barangay Tanza Uno, Navotas City, Linggo ng umaga, Setyembre 14, 2025.