Ched Rick Gatchalian

Article (news)

2 lalaki balik-kulungan matapos mangholdap ng guro at estudyante sa Caloocan

Kaxandra Salonga

ABS-CBN News

MAYNILA — Arestado nitong Martes ang dalawang lalaki matapos tangayin ang mga cellphone ng guro at estudyante sa Barangay 78, Caloocan City.Ayon sa 25-anyos na guro, kasabay niyang naglalakad pauwi ang 13-anyos na estudyante nang tutukan sila ng patalim at baril ng dalawang lalaking umaaligid sa kanila.“May sumunod po sa aming dalawang lalaki… lumapit na po sila, then dun na po, nilabas po nila yung baril, then dun sa kasama ko naman po patalim po sa kanya. Kinuha po yung gamit namin,” sabi ng 25-anyos na biktima.Natangay mula sa guro ang cellphone na nagkakahalagang P30,000. Tinakbo rin ng mga suspek ang P15,000 halaga ng cellphone ng estudyante.“Kinakabahan po ako noon ta’s naginginig na po sa takot… regalo po sakin ng papa ko ‘yun (cellphone) kasi po pinaghirapan niya ‘yun, tapos nakuha lang po nila,” sabi ng 13-anyos na biktima.Dumulog sa Barangay 78 ang mga biktima matapos ang insidente.Sa isinagawang follow-up investigation ng pulisya, natunton ang mga suspek sa Monumento at nakumpiska mula sa kanila ang mga ninakaw na cellphone, pati baril at balisong na ginamit sa krimen.“Pagala-gala sila dyan sa monumento sa mall at nahahanap ng mabibiktima… target usually nyan ay yung mga taong vulernable. Mga estudyante, minsan minor at yung mga empleyado na walang laban,” pahayag ni Northern Police District Acting District Director, PBGEN. Jerry Protacio.Napag-alaman na nasangkot na noon sa kasong robbery ang mga suspek at may record din sila ng paglabag sa Anti-gambling law, Alarms and Scandals, Comprehensive Dangerous Drugs Act.“Ito pong mga suspek matagal na tintinutugaygayan. Ang problema, nahuhuli pero nakakawala at ulit na naman ang holdap dahil hindi nagfafile yung mga biktima at natatakot,” sabi ni PBGEN. Protacio.Nasa kustodiya na ng NPD ang mga suspek na mahaharap sa kasong Robbery, paglabag sa Comprehensive Firearms and Ammunition&#x27;s Regulations act, at Special Protection of Children against Child Abuse, Exploitation, and Discrimination Act.Sasailalim naman sa counseling ang dalawang biktima.“Na-trauma na po ako, parang natakot na po ako sa mga tao ngayon,” sabi ng 13-anyos na biktima.Ayon sa pulisya, 67 na kaso ng robbery ang naitala ng NPD sa CAMANAVA mula Enero 1 hanggang Hunyo 31.  Kaya muling nagpaalala ang pulisya na manatiling alerto pag maglalakad sa mataong lugar at siguraduhin na nakatago ang mahahalagang gamit para maiwasan na mabiktima ng nakaw.

Arestado nitong Martes ang dalawang lalaki matapos tangayin ang mga cellphone ng guro at estudyante sa Barangay 78, Caloocan City.

Arestado nitong Martes ang dalawang lalaki matapos tangayin ang mga cellphone ng guro at estudyante sa Barangay 78, Caloocan City.