Geline Salac

Sapul sa CCTV: Lalaki namatay matapos bugbugin ng dating kinakasama ng girlfriend

Article (news)

Christopher Sitson

ABS-CBN News

Patay ang isang 21-anyos na lalaki matapos bugbugin ng dating live-in partner ng kanyang girlfriend sa loob ng tinutulugang kwarto sa Barangay Siete, Calamba, Laguna noong Biyernes ng madaling araw, January 9, 2026.Sa CCTV makikita ang suspek na binuksan ang pinto at ilaw sa silid.Bumungad sa kanya ang dating live-in partner na si Leana at kasalukuyan nitong boyfriend na si James sa kama.Dito na pinagsusuntok at tinadyakan ng suspek si James.Sinubukang awatin ni Leana ang dating live in partner pero nagpatuloy ito sa pag-atake.Nagtamo ng hindi bababa sa 20 magkakasunod na suntok at dalawang malalakas na sipa sa ulo ang biktima. Hindi nakapalag si James sa nangyaring pambubugbog at umalis din sa bahay ang suspek.“Itong lalaking sumugod ay kanyang karelasyon dalawang taon na ang nakakalipas na dati ring nakatira sa room. At itong bahay na ito ay pagmamay-ari ng magulang ng witness, itong babae na kinakasama ng victim,” sabi ni Police Captain Benhur Balgemino, Assistant Chief Investigation Section, Calamba PNP.Ayon kay Leana, sinabi umano ng kanyang dating kinakasama na kukuha lang ito ng damit ng kanilang apat na taong gulang na anak na hiniram ng suspek noong January 8.“Reporter: Lasing ba siya? Opo. Kukuha raw po siya ng damit ng anak ko sa  ganong oras. Eh pede ba yun? Ibabalik mo ‘yung anak ko sa umaga na eh bakit kukuha pa ng gamit sa bahay ko diba? Wala rin ako consent na pumunta ka rito,” sabi ni Leana Marie Perez, ang girlfriend ng biktima.Apat na araw na-confine sa ospital ang biktima matapos idaing ang pananakit ng ulo. Nagdiwang pa siya ng kaarawan sa ospital noong January 11, pero binawian din siya ng buhay noong January 14 ng hapon dahil sa matinding head injury.Posible umanong nag-ugat sa selos ang krimen ayon kay Leana at sa nanay ng biktima. Patuloy naman ang imbestigasyon ng PNP.“Anong karapatan niya? Bakit siya nananakit? Bakit siya nandoon sa loob ng bahay? Hindi niya pa rin matanggap na hiwalay na po kami. Maayos po kaming naghiwalay noon kahit hindi siya magsustento. Wala kang papakielaman sakin, wala akong papakielaman sainyo,” paliwanag ni Leana.“Siguro ho sa sobrang selos. Matagal na hong hiwalay eh. Dapat sport na lang siya,” sabi ni Maribeth Ticzon, nanay ng biktima.Mahaharap sa kasong murder ang 23-anyos na suspek na hindi na umano nagpakita simula pa noong January 10 nang ipatawag sa barangay, isang araw matapos ang insidente.“Under murder kasi po itong ating biktima ay natutulog, walang kalaban-laban, sinugod, at nakamamatay ang kaniyang pag-atake,” sabi ni PCpt. Balgemino.“Sana sumuko na siya at panagutan niya lahat ng ginawa niya. Magpapakakatag na lang po ako, kakayanin,” dagdag ni Leana.“Sobra po, sobra ang ginawa niya. Kailangang mapanagot siya at mahuli na talaga,” dagdag ng ina ng biktima.“Maiwasan itong pangyayari ito sa pamamagitan ng pakikipag-usap sa mahinahon na pamamaraan. Ginagamitan po ito ng isip, hindi lang po emosyon,” sabi pa ni PCpt. Balgemino.Nananawagan ng tulong-pinansyal ang pamilya ni James. Nasa P200,000 pa kasi ang kinakailangang nilang pondo para sa naiwang bayarin sa ospital hanggang sa pagpapalibing.Tiniyak naman ng Calamba PNP na tutulungan ang pamilya ni James na mapanagot ang suspek at makamit ang hustisya sa nangyaring krimen.

Nagtamo ng hindi bababa sa 20 magkakasunod na suntok at dalawang malalakas na sipa sa ulo ang biktima.

Nagtamo ng hindi bababa sa 20 magkakasunod na suntok at dalawang malalakas na sipa sa ulo ang biktima.