Geline Salac

Babae aksidente umanong nabaril sa paa ng kamag-anak sa Pandacan

Article (news)

Eon Sanchez

ABS-CBN News

MANILA — Sugatan ang paa ng isang 25-anyos na babae matapos tamaan ng bala sa loob ng kanilang bahay sa Barangay 867, Pandacan, Manila, Huwebes ng gabi, February 5, 2026.Ayon sa ulat ng pulisya, bandang alas-6:20 ng gabi nang mangyari ang insidente sa isang bahay sa H. Maligaya Street, Kahilum 2, Barangay 867.Batay sa salaysay ng biktima sa mga imbestigador, naghahapunan siya sa loob ng kanilang bahay matapos maglaba nang makarinig ng putok ng baril. Bigla na lamang umano siyang bumagsak at napansing may dugong umaagos sa kanyang kaliwang paa.Sa kuha ng CCTV, bandang alas-6:28 ng gabi nang makitang buhat-buhat ng kanyang kamag-anak ang biktima palabas ng eskinita upang isakay sa tricycle at dalhin sa ospital.Bandang alas-6:55 ng gabi nang ireport sa pulisya ang insidente matapos makatanggap ng tawag ang himpilan mula sa security guard ng Sta. Ana Hospital, kung saan isinugod ang biktima.Ayon sa pulisya, nang rumesponde ang mga operatiba sa lugar ay sarado na ang bahay at nasa ospital na ang mga residente.Bago mag-alas-7 ng gabi ay nalaman na rin ng mga opisyal ng barangay ang insidente at agad na rumesponde ang mga tanod at pulis. Tatlong beses umanong bumalik ang mga pulis para sa imbestigasyon.Sa panayam ng ABS-CBN News, sinabi ni punong barangay  Marlon Rivera na una umanong inakala na stray bullet ang tumama sa biktima.“6:30 ng gabi, kasalukuyan na akong nagpapahinga nang tumawag ang mga tanod at sinabing may insidente ng nabaril sa barangay,” ani Rivera.Dagdag pa nito, maayos naman umano ang pamilya at wala silang naitalang kaso sa barangay.“Pero ‘yung pamilyang iyon, maayos naman. Hindi naman magulo at wala ring kaso sa barangay,” ani ng opisyal.Ayon sa barangay, bandang alas-11:32 ng gabi nang pumasok ang pulisya sa bahay upang irekober ang dalawang baril, isang .45 caliber at isang airsoft gun. Makalipas ang anim na minuto, alas-11:38 ng gabi, lumabas ang mga pulis na dala na ang mga naturang baril.Isang residente naman na tumangging magpakilala ang nagsabing posible umanong namamaril ng daga ang suspek, bagay na maaaring ginagawa nito bago ang insidente.“Naririnig namin ang mga sabi-sabi na namamaril daw ng daga, lalo na tuwing gabi. Hindi naman sinasadya na natamaan ang kapatid,” ayon sa residente.Samantala, patuloy ang follow-up operation ng pulisya para matukoy kung sino ang nagpaputok ng baril at kung lisensyado ang nakuhang armas. Nananatili naman sa ospital ang biktima at isasailalim sa operasyon, ayon sa pulisya.

Isang residente naman na tumangging magpakilala ang nagsabing posible umanong namamaril ng daga ang suspek, bagay na maaaring ginagawa nito bago ang insidente.

Isang residente naman na tumangging magpakilala ang nagsabing posible umanong namamaril ng daga ang suspek, bagay na maaaring ginagawa nito bago ang insidente.