Geline Salac

100 katao nawalan ng tirahan sa sunog sa Cembo

Article (news)

ABS-CBN News

TAGUIG — Nasunog ang apat na bahay sa Tanguile Street sa Barangay Cembo, Taguig City pasado alas-11 ng gabi nitong Huwebes, Marso 26.Ayon sa Bureau of Fire Protection, residential area ang nasunog kung saan aabot sa apat na bahay ang naapektuhan, batay sa initial investigation ng BFP. Tinatayang 25 pamilya o humigit-kumulang 100 indibidwal ang nawalan ng tirahan. Pangalawang insidente na ito ng sunog sa lugar ngayong taon, ayon sa barangay.Walang naiulat na nasawi o nasugatan, ayon kay Taguig City Fire Marshal FSUPT Garynel Julian. Patuloy pa ring iniimbestigahan ang pinagmulan ng apoy.“Kailangan natin ng additional na pwersa in anticipation sa maaaring paglaki pa ng sunog,” ayon kay Julian, na nagsabing humina ang pressure ng pinakamalapit na fire hydrant at naging hamon ang makitid na mga kalsada sa pagpasok ng mga fire truck.Umabot sa 13 fire trucks mula sa BFP at 26 mula sa lokal na pamahalaan at volunteer groups ang rumesponde sa insidente. Bandang ala-1 ng madaling-araw ay kinapos ng suplay ng tubig, dahilan para magtulong-tulong ang mga residente sa pag-iigib.Tinatayang nasa P900,000 ang halaga ng pinsala.Ayon kay Kagawad Dudong San Pedro ng Barangay Cembo, inihahanda na ang evacuation center para sa mga nawalan ng tirahan.“With the help of our Taguig Social Welfare Department, may mga piniprepare na modular tents at sa bahagi ng barangay, naghahanda na rin kami ng pagkain,” aniya.Isa sa mga nasunugan si Erjon Oliva, na nasa trabaho nang mangyari ang insidente.Kuwento niya, nagulat na lamang siya nang makatanggap ng mensahe tungkol sa sunog.“Pagtawag ko sa mga kapatid ko, hindi na sila nagre-reply. Tumawag yung girlfriend ko, sabi niya samin daw yung sunog kaya nagmamadali akong pumunta,” aniya. “Pagdating ko, wala na. Wala akong nadatnan.”Hindi rin nila naisalba ang kahit anong gamit, kabilang na ang mga plastic material na kinakalakal ng kanyang kapatid.Labing-anim silang magkakasamang nakatira sa bahay.Bagaman walang nasaktan sa kanilang pamilya, hindi pa umano siya makapaniwala sa sinapit nila.“Hindi okay. Ngayon lang nangyari sa amin ‘to.”Nagpaalala naman ang BFP na kahit patapos na ang Fire Prevention Month, dapat manatiling maingat ang publiko upang maiwasan ang mga insidente ng sunog.Patuloy ang imbestigasyon sa sanhi ng sunog.

Nasunog ang apat na bahay sa Tanguile Street sa Barangay Cembo, Taguig City pasado alas-11 ng gabi nitong Huwebes, Marso 26.

Nasunog ang apat na bahay sa Tanguile Street sa Barangay Cembo, Taguig City pasado alas-11 ng gabi nitong Huwebes, Marso 26.