Virgilio Lorenzo Jr

Truck bumulusok sa bangketa sa Marikina; 2 patay

Article (news)

Darylle Sarmiento

ABS-CBN News

MAYNILA (UPDATED) - Nasawi ang dalawang indibidwal matapos bumulusok ang isang delivery truck ng asukal sa bangketa na bahagi ng Bgy. Barangka, Marikina City, pasado alas onse Sabado ng umaga, April 25. Kwento ng residenteng nakakita matulin ang pagpapatakbo ng truck, kung kaya sa lakas ng pagkakabangga natanggal pati ang mga bollard sa bangketa. “Ang bilis nung truck sa dami ng… 150 sacks daw yung dala dala na tig 50 kilos eh, ang liit liit ng truck,” ayon sa residenteng nakakita. Ayon pa sa Deputy EX-O ng barangay, nawalan umano ng preno ang truck. “Siguro sa kabigatan ng karga niya, lumusot yung preno niya yun siguro ang kadahilanan ng pagkawala niya ng preno, sa kabigatan ng karga niya,” sabi ni Ryan Cheers, Deputy Ex-O ng Bgy. Barangka. Nadamay pati ang ilang sasakyan sa lugar, basag ang unahang bahagi ng truck, habang nasira rin ang ilang parte ng tindahan ng pritong manok na nasalpok. “Nasagi may mga nagkarambolang sasakyan at yung napailalim na impormasyon namin, batang badjao na namamalimos, na nagulungan. Talagang napakasama ng tama ng bata,” ayon kay Cheers. Dagdag ng barangay, naiwan sa crime scene ang mga barya at ilang gamit ng batang nanlilimos at nasawi. Ayon pa sa barangay ang isang biktima ay napadaan lang sana para makabili ng pritong manok sa tindahang nasalpok. “Saka yung namimili ng, mamimili lang siguro ng pananghalian nila, namimili. Eh, nakatalikod hindi niya alam na doon sasalpok, nawalan ng preno. Kaya, hindi talaga siya nakaiwas, talagang napitpit yung tao na yun,” sabi ni  Cheers. Inilarawan din ng residenteng nakakita ang sitwasyon ng mga biktima pagkatapos ng pagkakabangga. “Nakita ko na dito yung truck pasok dito, yung lalaki ipit na. Tapos yung bata andidito putol yung paa, doon namamalimos yun eh. Tapos, iyak nang iyak na yung babae. Sigaw na nang sigaw,” sabi ng residenteng nakakita. Nasa kustodiya na ng Marikina City police ang driver at pahinante ng truck habang nagpapatuloy ang imbestigasyon at inaalam pa ang eksaktong bilang ng mga nasugatan sa insidente. Nagtirik ng kandila ang mga residente sa pinangyarihan ng pagkakabangga.

Patuloy pa ang imbestigasyon pero posible umanong nawalan ng preno ang delivery truck na may kargang asukal.

Patuloy pa ang imbestigasyon pero posible umanong nawalan ng preno ang delivery truck na may kargang asukal.