Daven Tamayo

Ang bata sa maleta: The Dindin Palma murder case

Article (news)

Kevin Alabaso

ABS-CBN News

<p>Akala ng dalawang batang nangangalakal na naka-jackpot na sila nang makakita ng lumulutang na maleta sa Manila North Harbor Area noong 2007.</p><p>Ang nasa isip nila, maaaring nahulog ito mula sa isa sa mga container van at may laman na mga damit, kagamitan, o pera.</p><p>Ngunit nang buksan ang maleta, tumambad sa kanila ang nakabaluktot na bangkay ng isang batang babae na si Geraldine “Dindin” Palma.</p><p>Pero sino nga ba si Dindin at paano nauwi sa karumal-dumal na krimen ang nangyari sa kaniya?</p><div><br/></div><div><strong>AGOSTO 11, 2007 (SABADO)</strong></div><p>Kahit weekend na, naka-schedule pa rin na pumunta sa isang tutoring session ang 7-anyos na si Dindin malapit sa bahay nila sa gated subdivision na Riverside Village sa Pasig City.</p><p>Kwento ni Gerald, ama ni Dindin, masayahin at masipag mag-aral ang Grade 1 na anak at pangarap pa umano nitong maging doktor.</p><p>Sa pagpunta ni Dindin sa tutor nito, kasama niya ang kasambahay nilang si Maritess “Mayet” Ontog na 5 buwan pa lang nagtatrabaho bilang tagapangalaga ni Dindin.</p><p>Matapos ang tutoring session, umuwi sila bandang alas-12 ng tanghali. Pero ayon sa isang kapitbahay, nakita rin umano silang umalis bandang mga ala-1 ng hapon.</p><p>Pasado alas-3 ng hapon, umuwi na ang ama ni Dindin galing trabaho at nagtaka ito kung bakt wala pa rin ang anak sa bahay.</p><p>Matapos maghintay ng ilang oras para sa pagdating ng kaniyang anak at ni Mayet, wala pa ring dumadating, dahilan para siya ay kutuban na sa kung ano man ang nangyari sa kaniyang anak.</p><p>Kalaunan ay may tumawag sa telepono na agad namang sinagot ni Gerald.</p><p>“Mr. Palma, nasa amin ‘yung anak niyo. Maghanda ka  ng 10 million,” sabi ng caller.</p><p>Agad napalabas ng bahay si Gerald at pumunta sa mga security guard na nagbabantay sa subdivision.</p><p>Sa isip ni Gerald, imposibleng may makapasok sa kanilang subdivision nang hindi dumaan sa security guards.</p><p>Pero ayon sa security, wala silang nakitang kahit sino o ano na kahina-hinalang lumabas o pumasok sa kanilang lugar.</p><p>Dahil dito, kumuha si Gerald ng litrato ng kaniyang anak at nag-ikot para magtanong sa mga tao.</p><p>Ngunit ni isa, ay walang nakapagturo sa kung asan ang anak, dahilan para siya ay lumapit na sa pulis at humingi ng tulong.</p><p>Pero matapos ang ilang sandali, nakatanggap muli si Gerald ng tawag mula sa kidnapper kung saan galit ito dahil nalaman niyang humingi ng tulong sa mga awtoridad si Gerald.</p><p>Kasabay nito, sinabi rin niyang pinatay na nila si Mayet.</p><div><br/></div><div><strong>RANSOM</strong></div><p>Patuloy na nakipag-negosasyon ang mga kidnapper kina Gerald at Felma (ina ni Dindin), hanggang sa maibaba nila sa P245,000 ang ransom money.</p><p>Sa kabila ng kahina-hinalang pagbaba ng ransom money, umaasa pa rin ang mga magulang ni Dindin na sapat na ito para matubos ang anak.</p><p>Dumating ang araw ng palitan ng pera at ng anak, bitbit ni Gerald at pera at dumiretso sa napagkasunduang lugar sa Lower Bicutan sa Taguig City, kasama ang ilang kamag-anak at pulis.</p><p>Ilang oras naghintay si Gerald ngunit inabot na ito ng madaling araw pero no-show pa rin ang mga kawatan.</p><p>Kinausap na ng mga pulis si Gerald na huminto na ito sa paghihintay at mukhang wala namang planong sumipot talaga ang mga kidnapper.</p><p>Heartbroken ang mga magulang ni Dindin na umuwi at naghintay na makausap muli ang mga kidnapper ngunit wala na silang nataggap ulit na anumang tawag.</p><div><br/></div><div><strong>AGOSTO 16, 2007 (HUWEBES)</strong></div><p>Limang araw nang nawawala si Dindin at dito na rin pumutok ang balita tungkol sa natagpuang bangkay ng isang batang babae sa loob ng isang maleta sa Isla Puting Bato sa Tondo.</p><p>Dalawang bata ang nakapansin sa palutang-lutang na dark green na maleta habang sila ay nangangalakal sa breakwater.</p><p>Dali-dali umano nilang binuksan ang maleta sakaling may maaaring pagkakitaan rito ngunit ang tanging nakita lang nila ay ang katawan ng batang babae.</p><p>Wala itong damit pang-itaas, naka-dilaw na jogging pants, at may itim na kable na nakapulupot sa kaniyang leeg.</p><p>Ayon sa mga awtoridad, nasa bandang 4 feet ang tangkad ng bata na ipinilit ipagkasya sa loob ng maleta kaya nakabaluktot ang katawan nito.</p><p>Nang makita ito sa balita, nagmadaling pumunta sa punerarya sina Gerald at Felma para malaman kung si Dindin nga ang natagpuan sa maleta.</p><p>Nang makarating sa punerarya, kahit mismong si Felma ay nahirapan kilalanin ang bangkay dahil bloated at inaagnas na ito.</p><div><br/></div><div><strong>2 NAWAWALANG BATA</strong></div><p>Dahil nasa advanced state na ng decomposition ang natagpuang bangkay, naging malaking hamon para sa mga awtoridad ang malaman ang pagkakakilanlan nito.</p><p>Bukod pa rito, pumasok rin sa eksena si Julieta Salvatierra na isang residente ng Tondo, Maynila, na ilang araw na ring hinahanap ang nawawalang anak na si Jessalyn, 12-anyos.</p><p>Huling nakita umano si Jessalyn noong Agosto 2, 2007 na pumasok sa paaralan at hindi na nakauwi.</p><p>Gaya nina Gerald at Felma, nagpunta rin agad si Julieta sa punerarya para silipin kung ang anak ba niya ang bangkay.</p><p>Ngunit nakita nito na iba ang tangkad ng batang natagpuan at mas matangkad si Jessalyn.</p><p>Iba rin umano ang buhok at mata ng bangkay kumpara sa nawawalang anak ni Julieta.</p><p>Sa parte naman ni Gerald, kumbinsido siyang si Dindin ang batang natagpuan sa maleta dahil na rin sa nakitang dilaw na jogging pants.</p><p>Sa isinagawang autopsy at DNA test ng Manila Police District, inconclusive ang naging resulta dahil masyado na umano kontaminado ang bangkay.</p><p>Ito’y dahil na rin nangyari ang krimen noong 2007 kung saan hindi pa ganoon ka-hi-tech ang forensic testing ng mga crime laboratory sa bansa.</p><p>Ngunit kahit walang opisyal na resultang nagpapatunay na si Dindin ang narekober, kinuha ng pamimlya Palma ang katawan.</p><div><br/></div><div><strong>AGOSTO 26, 2007</strong></div><p>Inilibing na sa Manila Memorial Park sa Parañaque si Dindin pero blangko pa rin ang pamilya Palma sa kung sino ang nasa likod ng krimen.</p><p>Kidnap for ransom ang unang nakitang motibo ng PNP at posibleng may kinalaman rin umano si Mayet sa pagdukot sa bata.</p><p>Lumabas din sa medico legal mula sa Manila Police District na posibleng hinalay ang biktima.</p><p>Makalipas ang ilang panahon, nagkaroon ng iba’t ibang pag-aresto ang Manila Police.</p><p>Isang Dominic Agnote ang inaresto ng mga awtoridad kaugnay ng iba pang paglabag sa batas pero sa gitna umano ng pag-iinterrogate sa kaniya ng mga pulis ay nabanggit nito na  may alam siya tungkol sa kaso ng bata sa maleta.</p><p>Ayon kay Agnote, bumisita siya sa bahay ng kaibigang si Henry nang marinig niyang nag-uusap ang apat na iba pang lalaki na nasa bahay.</p><p>Pinaguusapan umano ng mga lalaki papaano nila dinukot, hinalay, at pinatay ang isang batang babae bago nila ito itinago sa maleta.</p><p>Dahil dito, agad inaresto ng pulis ang mga lalaki na sina Henry Redoblado, Ramil Diorico, Renato Bohol, at Joey Nodalo.</p><p>Isang witness rin ang lumutang at nagsabing nakita niya umano ang panggagahasa sa biktima sa may Isla Puting Bato.</p><p>Nakasuhan ang mga lalaki ng rape with homicide at kidnapping-for-ransom, pero lahat sila hanggang sa kulungan ay sinasabing wala silang kinalaman sa pagpatay kay Dindin.</p><div><br/></div><div><strong>HINDI MALINAW NA EBIDENSIYA</strong></div><p>Ang naging problema sa kaso ay maraming elemento na hindi malinaw ang ebidensiya.</p><p>Kabilang na rito ang magkakalayong tirahan ng mga inarestong suspek kung saan ang isa ay taga-Quezon City, ang isa ay taga-Bulacan, at ang iba naman ay taga-Tondo.</p><p>Wala sa kanila ang nakatira sa Pasig kung saan ang bahay ni Dindin.</p><p>Hindi rin klaro kung bakit si Dindin ang target ng mga nasabing suspek at hindi ito masagot sa imbestigasyon ng Manila Police.</p><p>Mismong si Gerald ang hindi rin kumbinsido sa naging takbo ng imbestigasyon ng pulisya kaya’t lumapit na ito sa NBI.</p><p>Nagsagawa ng hiwalay na imbestigasyon ang NBI, pati na rin ng DNA test. Kinailangan rin hukayin ang bangkay para sa hiwalay na autopsy ng NBI.</p><p>Nagfacilitate rin ang NBI ng hiwalay na DNA test mula sa bansang Bosnia, gamit ang femur bone ng bangkay o ‘yung buto sa hita.</p><div><br/></div><div><strong>MARSO 24, 2009</strong></div><p>Dalawang taon ang itinagal ng nangyaring imbestigasyon ng NBI at lumabas rito na mayroong 99.9 percent match ang DNA sample ng bangkay sa DNA ni Felma.</p><p>Dahil dito, sigurado nang si Dindin at batang babae sa maleta, at kahit na masakit ito para sa pamilya, nakamit na nila ang closure sa pagkakakilanlan ng bangkay.</p><p>Kasabay nito, nadiskubre din na hindi pala si Gerald ang tunay na ama ni Dindin. Live-in partner ni Felma si Gerald.</p><p>Ngunit para kay Gerald, itinuring naman niyang tunay na anak si Dindin.</p><p>Isa pang nadiskubre ng NBI ay fully intact ang hymen ni Dindin, ibigsabihin ay maliit ang tiyansa  na hinalay ito, na taliwas sa mga witness accounts na nakuha ng pulisya.</p><p>Dahil sa resulta ng imbestigasyon ng NBI, naging primary suspect na si Mayet, ang kasambahay na huling nakasama ni Dindin.</p><p>Pero kahit ilang manhunt operation ang isinagawa ng PNP at NBI, hindi na nakita si Mayet.</p><div><br/></div><div><strong>MAYO 28, 2014</strong></div><p>Makalipas ang 7 taon na pagkakakulong ng mga suspek, pinawalang sala ng Manila Regional Trial Court sa kasong rape with homicide ang apat na suspek. Ito’y dahil sa ulat ng NBI na intact ang hymen ni Dindin.</p><p>Napa-walang sala rin sina Nodalo at Bohol sa kidnapping charges.</p><p>Sa nangyaring pagpapa-walang sala sa apat na suspek, mas lalo lang dumami ang mga katanungan sa nangyaring krimen. </p><p>At hanggang ngayon na halos 20 taon na ang nakalipas mula sa nangyaring krimen, inaasam pa rin ng Pamilya Palma ang hustisya at malaman kung sino ang may sala sa kinahinatnan ni Dindin.</p><div><br/></div><p>Panoorin dito ang pinakabagong episode ng &quot;Philippines&#x27; Most Shocking Stories&quot;:</p><div><span class="fr-video fr-deletable fr-fvc fr-dvb fr-draggable" contenteditable="false" draggable="true"><iframe width="640" height="360" src="https://www.youtube.com/embed/KKcB1gdNIY0?&amp;wmode=opaque&amp;rel=0" frameBorder="0" allowfullscreen="" class="fr-draggable"></iframe></span><br/></div>

<p>Sino nga ba si Dindin at paano nauwi sa karumal-dumal na krimen ang nangyari sa kaniya?</p>

Sino nga ba si Dindin at paano nauwi sa karumal-dumal na krimen ang nangyari sa kaniya?