Daven Tamayo

Crime of passion: Ang 'chop-chop lady' ng Maynila

Article (news)

Kevin Alabaso

ABS-CBN News

<p>Nagkukumpulan ang mga grupo ng mga tao at mga tricycle drivers sa isang daan sa Laguna.</p><p>May pinagkakaguluhan pala dahil ang nakita nila ay isang pugot na ulo ng isang babae.</p><p>Ito ang dinatnan ng mga ahente ng National Bureau of Investigation (NBI) na naghahanap sa isang babaeng pinaniniwalaang pinatay ng kaniyang Amerikanong lover.</p><p>Pero sino nga ba ang biktimang ito?</p><p>Balikan dito ang kwento ng trahedya ng tinaguriang “chop-chop lady” ng 1990s na si Elsa Castillo.</p><div><br/></div><div><strong>SINO SI ELSA?</strong></div><p>Si Elsa Castillo ay isang assistant personnel manager ng isang car distributor company noong 1993.</p><p>May asawa si Elsa pero noong panahong ‘yun ay naghiwalay na sila.</p><p>Sa trabaho, naging ka-close ni Elsa ang kaniyang boss, ang American manager niyang si Stephen Mark Whisenhunt. May asawa rin si Stephen pero hindi na rin niya ito nakakasalamuha.</p><p>Kalaunan, nagkarooon si Elsa at Stephen ng affair. At dahil na rin sa kanilang posisyon sa kumpanya ay hindi maiiwasan ang tsismis at bulung-bulungan sa kanilang relasyon.</p><p>Dahil dito, nag-resign si Elsa para matigil na ang tsismisan sa opisina pero hindi naman naputol ang kanilang relasyon ni Stephen.</p><div><br/></div><div><strong>SETYEMBRE 23, 1993 (8:30 A.M.)</strong></div><p>Inutusan ni Stephen ang kaniyang driver na si Demetrio Ravelo Rio na sunduin si Elsa.</p><p>Si Rio ay manggagaling sa condominium sa greenhills kung saan nakatira si Stephen. Si Elsa, susunduin ni Rio sa bahay ng mga magulang ni Elsa sa Blumentritt, Maynila.</p><div><br/></div><div><strong>10:30 A.M.</strong></div><p>Mga ganitong oras dumating si Rio sa lugar ni Elsa at nakita niyang nakatayo na si Elsa sa kanto ng bahay, suot ang kulay violet na blouse na may floral print.</p><p>Ayon kay Rio, may dala si Elsa  na tatlong bag – paper bag, violet na bag, at makapal na leather brown bag.</p><p>Nang masungo, inihatid na ni Rio si Elsa  sa condo unit ni Stephen.</p><div><br/></div><div><strong>2:00 P.M.</strong></div><p>Mga alas-2 ng hapon, inutusan ni Elsa si Rio na magpunta sa opisina sa Mandaluyong para i-deliver ‘yung paper bag sa isang dating katrabaho sa car distributor company.</p><p>Matapos nito, bumalik din si Rio sa condo.</p><p>Pagbalik niya, sinabihan siya ni Stephen na huwag aalis dahil ipapahatid niya si Elsa pagsapit ng alas-10 ng gabi.</p><p>Pero dumating ang alas-10 ng gabi, ‘di pa rin lumalabas ng kuwarto si Elsa at wala rin pasabi si Stephen.</p><p>Dahil dito, pinuntahan ni Rio ang house helper na si Lucy at sinabing uuwi na muna siya.</p><div><br/></div><div><strong>SETYEMBRE 24, 1993</strong></div><p>Pumasok na ulit sa trabaho si Rio pero bandang tanghali, tinanong ni Lucy si Rio kung nakita ba niya ang nawawalang kutsilyo sa kusina.</p><p>Narinig ni Stephen ang usang ng dalawa at sinabi niyang nasa kuwarto niya ang kutsilyo. Kinuha ito ni Stephen sa kuwarto at ibinigay kay Lucy.</p><div><br/></div><div><strong>3:40 P.M.</strong></div><p>Inutusan ni Lucy si Rio na bumili ng sigarilyo para kay Stephen.</p><div><br/></div><div><strong>5:00 P.M.</strong></div><p>Sinabihan ni Stephen si Rio na pwede na siyang umuwi.</p><div><br/></div><div><strong>SETYEMBRE 25, 1993</strong></div><p>Nagreport na ulit ng maaga sa trabaho si Rio sa condo ni Stephen.</p><p>Araw ng sweldo ito at nagpaalam si Rio na kukunin muna ang sweldo sa opisina. Pumayag naman si Stephen.</p><p>Sa opisina, tinanong ng empleyadong binigyan ni Elsa nung paper bag kung nasa condo pa ba ni Stephen si Elsa.</p><p>Kahit na hindi na niya ulit nakita si Elsa simula noong sinundo niya ito, sinabi pa rin ni Rio na nasa condo pa ito.</p><p>Ini-abot ng ka-opisina kay Rio ang ilang black plastic garbage bags para kay Elsa kaya bumalik ng condo si Rio at inabot ang mga garbage bags kay Stephen para kay Elsa.</p><p>Sinabi umano ni Stephen na ihatid muna ni Rio ang house helper na si Lucy sa may Cubao, at umuwi siya para kumuha ng mga damit at pupunta sila sa Bagac, Bataan. May rest house si Stephen sa Bagac.</p><p>Bumalik sa condo si Rio ng mga alas-10 ng umaga.</p><p>Pinakuha muna ni Stephen si Rio ng gas slip sa opisina para makargahan ng gasolina ang sasakyan para sa trip nila.</p><p>Sa condo, tumambay muna sa servant’s quarters si Rio at nanood ng TV habang naghihintay nang bilang pumasok ang among si Stephen.</p><p>“Hanggang kailan mo gusto magtrabaho sa akin?” ani Stephen.</p><p>“Habang buhay po dahil malaki po ang tiwala ko sa inyo,” sagot ni Rio.</p><p>Dito na sinabi ni Stephen na “may problema ako, Rio” at kalaunan ay sinabi ni Stephen na patay na si Elsa.</p><p>Tinanong siya ni Rio na “bakit mo siya pinatay?”</p><p>Itinanggi naman ni Stephen na pinatay nito si Elsa at sinabing bangungot ang ikinamatay nito.</p><p>Pinayuhan ni Rio si Stephen na ipa-autopsy ang bangkay ni Elsa para hindi siya ang mapagbintangang pumatay sa kaniya.</p><p>Pero dito na sinabi ni Stephen na napugutan na niya ng ulo si Elsa.</p><p>Tinanong pa ni Stephen si Rio ng “gusto mo makita?” kung saan naman humindi rin si Rio.</p><p>Matapos  ang rebelasyong ito, ipinagdrive ni Rio si Stephen sa isang mall sa Greenhills. Bumili si Stephen ng malaking bag na may zipper at rollers na kulay black at gray. Napansin rin ni Rio na namumula ang mga mata ni Stephen at tila naiiyak.</p><p>Pagbalik sa condo, inutusan ni Stephen si Rio na balutin ng black garbage bags ang chop-chop na katawan ni Elsa.</p><p>Pagpasok ni Rio sa kwarto, nakita niya sa banyo ang putol-putol na mga kamay, paa, katawan, at ulo ni Elsa.</p><p>Sa buhok hinawakan ni Rio ang pugot na ulo at inilagay ito kasama ang ilang bahagi ng katawan ni Elsa sa tatlong garbage bags at ikinarga sa trunk ng kotse.</p><p>Pagsakay nila ng kotse, umupo sa passenger side si Stephen at umalis sila ng condo ng alas-2 ng hapon.</p><p>Sabi ni Stephen kay Rio, pupunta sila sa may Tagaytay at Batangas at pagpasok sa SLEX papuntang Sta. Rosa, Laguna sa bandang Puting Kahoy at Silangan, pinahinto ang kotse.</p><p>Inutusan si Rio na bumaba, kunin ang mga garbage bags na may laman ng pina-pirasong katawan ni Elsa na nasa loob ng malaking maleta at itapon sa tabing kalsada.</p><p>Matapos ito ay  sinabi ni Stephen na tutuloy na sila papuntang Bataan.</p><p>Habang papunta sa mansyon ni Stephen sa Bagac, pinahinto ulit ang kotse at itinapon naman ang mga damit ni Elsa.</p><p>Ang violet bag ni Elsa, itinapon rin banda sa Pilar, Bataan.</p><p>Sa boundary naman ng Bagac, itinapon ang iba pang damit.</p><p>Dahil dito, hatinggabi na nang makarating sila sa mansyon pero hindi umano makatulog si Rio. Natatakot siyang baka siya naman ang isunod ni Stephen.</p><div><br/></div><div><strong>SETYEMBRE 26, 1993 (11:00 A.M.)</strong></div><p>Inutusan ni Stephen si Rio na linisin ang trunk ng kotse para hindi raw bumaho.</p><p>At bandang ala-1 ng hapon, umalis na sila ng Bataan papunta ng Maynila.</p><p>Nang makarating sila sa EDSA ng mga alas-2:30 ng hapon, nagpababa na raw si Rio. Hiningi niya na makauwi na ito sa bahay niya.</p><p>Sinabi ni Stephen kay Rio, “Pwede kang magbakasyon Rio ha, bibigyan kita ng pera.”</p><p>Pagkauwi ni Rio, hindi siya mapakali at agad na ikinuwento ang nangyari sa asawa.</p><p>Sinabi ng kaniyang asawa na lumapit sila sa isang kaibigan piskal para humingi ng tulong.</p><div><br/></div><div><strong>SETYEMBRE 27, 1993</strong></div><p>Kasama ang kaibigang piskal, si Rio at ang asawa ay pumunta sa Department of Justice na itinuro sila sa NBI.</p><p>Una, hindi naniwala ang mga ahente ng NBI at tingin nila ay exaggerated ang kwento ng driver na si Rio.</p><p>Pero para  masiguro ang katotohanan, pinuntahan at ni-retrace nila ang ikinuwentong dinaanan ni Rio sa pag-dispose ng mga pira-pirasong katawan.</p><p>At nang makarating sila sa isang barangay sa Sta. Rosa, Laguna, doon nila nakkita ang mga nagkukumpulang tao.</p><p>Nauna na palang nadiskubre ng mga tricycle driver ang pugot na ulo at  iba pang pirasong katawan ni Elsa na nakatapon sa tabing daan.</p><p>Dinala ng NBI ang mga labi sa punerarya at saka ibinalita ang masamang nangyari kay Elsa sa kaniyang pamilya.</p><div><br/></div><div><strong>SETYEMBRE 28, 1993</strong></div><p>Dahil sa pag-amin ni Rio na tinuro si Stephen na nasa likod ng pagpaslang kay Elsa, inaresto si Stephen sa opisina niya sa Mandaluyong.</p><p>Napansin ng mga tauhan ng NBI ang  mga pasa sa pisngi, sugat sa labi, at sugat sa iba’t ibang bahagi ng katawan ni Stephen.</p><p>Inimpound rin nila ang kotse ni Stephen pero bago kunin ng NBI ang kotse, nakusap pa si Stephen na kunin muna niya ang mga gamit sa kotse.</p><p>Nang buksan ang trunk, sa sangsang ng amoy na lumabas mula rito ay napalayo ang mga nakapaligid na tao.</p><p>At gaya ng inaasahan, ang lawanit board sa trunk ng kotse, may nakitang mga bakas ng dugo ang NBI agents.</p><p>Agad na ikinulong sa NBI si Stephen matapos siyang pumirma ng waiver para sa agarang preliminary investigation sa kaso.</p><div><br/></div><div><strong>SETYEMBRE 29, 1993</strong></div><p>Gamit ang search warrant, pinasok ng NBI ang condo ni Stephen at dito nakita ang iba pang ebidensiya.</p><p>May mga bakas ng dugo sa banyo, sa lampshade, sa kama, sa isang sapatos, at kahit sa isang bote ng cough syrup.</p><p>Kalaunan ay napatunayan na ang mga dugo ay pareho ng blood type ni Elsa.</p><p>Binalikan din ng NBI ang iba pang ruta na dinaanan nila Stephen at Rio nung tinapon ang mga kagamitan ni Elsa.</p><p>Doon narekober nila ang violet bag, isang brown sandal at dami ni Elsa.</p><div><br/></div><div><strong>NOVEMBER 19, 1993</strong></div><p>Makalipas ang ilang linggo, sinampahan si Stephen Mark Whisenhunt ng kasong murder sa Pasig Regional Trial Court.</p><p>Sa autopsy, lumalabas  na ang cause of death ni Elsa ay mga saksak sa katawan – sa dibdib at abdomen.</p><p>At kahit na narekober na ang ulo, kamay, paa, at iba pang piraso ni Elsa, lumabas rin sa autopsy na nawawala ang mga tuhod niya.</p><div><br/></div><div><strong>ALIBI NI STEPHEN</strong></div><p>Ano ang version ni Stephen?</p><p>Hindi raw niya pinatay si Elsa at nagsisinungaling daw si Rio.</p><p>Aniya, noong Setyembre 23, hindi niya pinasundo si Elsa at masama ang pakiramdam niya noon kaya nasa condo lang siya.</p><p>Hindi rin niya nakita buong maghapon si Rio noong sunod na araw, Setyembre 24.</p><p>Noong Setyembre 25 naman, sinabi ni Stephen na gumanda ang pakiramdam niya kaya inaya na niya si Rio na magpunta sila sa Bataan.</p><p>Umalis umano sila ng condo sa pagitan ng ala-1 at ala-1:30 at dumirestso sa Bataan. Pagdating pa umano sa mansyon ay dumiretso siya sa kusina at nakita siya ng kaniyang mga magulang at lola.</p><p>Dagdag pa ng ina ni Stephen, dumating sa beach house ang anak mga alas-5 ng hapon. Iba ito sa sinabi ni Rio na magha-hatinggabi na sila nakarating.</p><p>Alas-7 ng umaga kinabukasan ay nakita pa ng ina na naka beach attire si Stephen.</p><p>Sabi pa ni Stephen, nag-jetski siya noong Setyembre 25 at nawalan ng kontrol dahil sa mga alon at doon niya nakuha ang mga galos sa mukha at katawan.</p><p>Nakuha naman daw niya ang mga sugat sa braso nang madulas sa hagdan.</p><p>Nalaman na lang daw ni Stephen na patay na si Elsa nang puntahan siya ng mga NBI agents sa kaniyang opisina noong Setyembre 28.</p><p>Aniya, wala siyang dahilan para patayin si Elsa dahil mahal niya ito.</p><p>May ipinakita pang anonymous letters si Stephen na kaniya umano natanggap noon bago pa mamatay si Elsa.</p><div><br/></div><div><strong>UNANG SULAT</strong></div><p>“Salamat sa pagpapahiram mo ng sasakyan at driver. Pero masyado kang pakialamero, Steve. Walanghiya ka. Para kang demonyo. Pinakialaman mo ang ‘di sa ‘yo. Lintik lang ang walang ganti. Matitiyempuhan din kita.”</p><div><br/></div><div><strong>PANGALAWANG SULAT</strong></div><p>“Ang kay Pedro kay Pedro. Kapag pinakialaman ay kay San Pedro ang tungo. Mahal mo ba ang pamilya mo? Iniingatan mo ba ang pangalan mo? Nakakasagasa ka na.”</p><p>Ayon kay Stephen, sinabi ni Elsa na galing umano uto sa asawa ni Elsa.</p><p>Tumestigo rin ang tiyahin ni Stephen at sinabi nitong nagpunta siya sa condo ni Stephen noong Setyembre 23 at wala naman umano siyang nakitang kasama sa kwarto at wala rin nakitang tao sa banyo.</p><div><br/></div><div><strong>VERDICT</strong></div><p>Sa paglilitis ng korte, mas pinaniwalaan nito ang star witness na driver na si Rio.</p><p>Una, lahat ng kinuwento ni Rio na nangyari – mula sa nakitang pira-pirasong katawan ni Elsa sa banyo, sa pagtambak nito sa trunk ng kotse, sa pagtapon ng ulo at katawan sa Laguna, at pagtapon ng mga gamit  ni Elsa sa papuntang Bataan – lahat ‘yan napatunayan ng ebidensya.</p><p>At ‘yung iba pang testimonya ni Rio tungkol sa kutsilyong hinahanap ng maid, napatunayan rin na totoo ng korte.</p><p>At sinabi rin ng kotse na mas kapani-paniwala si Rio dahil agad nitong sinumbong sa awtoridad ang krimen.</p><div><br/></div><div><strong>NOBYEMBRE 2001</strong></div><p>Makalipas ang 7 taon, hinatulan si Stephen ng guilty sa kasong murder.</p><p>Ang parusa, reclusion perpetua o habambuhay na pagkakakulong.</p><p>Bukod sa  pagkakakulong, inutusan ng korte na magbayad ng P3 milyon na danyos si Stephen sa pamilya ni Elsa at magbayad ng karagdagang P100,000 para sa mga nagastos sa pagpapalibing.</p><div><br/></div><div><strong>DISYEMBRE 27, 2012</strong></div><p>Matapos ang higit 19 taon sa Bilibid Prison, pinalaya si Stephen dahil sa “Good Conduct Allowance.”</p><p>Matapos ang 2 buwan, pina-deport si Stephen papuntang US at banned na sa pagbalik sa Pilipinas. Blacklisted na siya ng Bureau of Immigration.</p><div><strong>Panoorin dito ang bagong episodes ng Philippines’ Most Shocking Stories: https://www.youtube.com/playlist?list=PLgyY1WylJUmjAYk8ksAvCzsq37b6wUdh7</strong></div>

<p>Balikan dito ang kwento ng trahedya ng tinaguriang “chop-chop lady” ng 1990s na si Elsa Castillo.</p>

Balikan dito ang kwento ng trahedya ng tinaguriang “chop-chop lady” ng 1990s na si Elsa Castillo.