Bahagi ng tulay sa Isabela, bumagsak

ISABELA — Bumagsak ang bahagi ng bagong tulay na kumukonekta sa bayan ng Sta. Maria at Cabagan sa Isabela ngayong Huwebes ng gabi, February 27.

Ayon kay Aljorey Eduard Bernaser, assistant LDRRM officer, bandang alas-8:10 ng gabi nang makatanggap sila ng tawag tungkol sa pagbagsak ng tulay.

Nadamay sa insidente ang apat na dumaraang sasakyan kabilang ang isang dump truck, dalawang SUV at isang motorsiklo.

Nasagip naman ang anim na indibidwal na lulan ng mga sasakyan at dinala sa malapit na ospital.

“So far ‘yung mga nailawan namin na sightings, wala naman na pong katawan. Overall lahat ng na-rescue natin ay conscious. ‘Yung motorcycle rider ang nabalian ng paa,” ani Bernaser.

Hindi pa malinaw kung anong bahagi ng tulay ang bumagsak pero nasa lugar na para mag-inspeksyon ang Municipal Engineering Office.

“Kasalukuyan pa po ang assessment ang engeering para magbigay ng initial findings sa sitwasyon ng tulay,” ani Bernaser.

Iniimbestigahan din ang dahilan ng pagbagsak ng tulay pero isa sa tinitingnang dahilan ay ang pagdaan ng dump truck na may kargang mga bato.

“Yung truck mismo na dumaan is carrying a heavy load, a lot of rock sa mismong trunk niya, kaya ‘yun mismo ang nakadagdag sa [bigat],” dagdag ni Bernaser.

Magsasagawa na rin ng imbestigasyon sa nangyari ang DPWH Region 2.