Bigla na lang nawalan ng power supply ang bahagi ng Bacolod City at bayan ng Murcia sa Negros Occidental alas dos ng hapon ng Miyerkules, ika-5 ng Marso.

May dumaan kasing buhawi sa Barangay Blumentritt sa Murcia na naging dahilan kung bakit naputol ang mga kable ng kuryente.

Nakunan pa ng video ni Mark June Belsa ang pagliyab ng mga kable habang dinadaanan ng buhawi.  Umurong sila kaagad at hindi muna tumuloy habang na sa daan pa ang buhawi.

Sa video naman ni Andrew Briz kitang-kita rin ang pagliyab ng mga kable at ang mga dala dalang yero ng buhawi.

Pansamantala silang tumigil sa daan sa pangamba na baka mahagip ang mga live wire.

Nagbigay alam kaagad ang Negros Power sa mga konsumedor na kailangan muna nilang ayusin ang mga apektado na linya ng kuryente bago maibalik ang power supply.

Inaalam pa ng LGU ng Murcia ang pinsala na naidulot ng buhawi.

Wala namang naiulat na nasugatan sa nangyari.