Nelson Morales

TV PATROL: Isa patay, isa sugatan sa pagsalpok ng tricycle sa closed van

Article (news)

ABS-CBN News

Isa ang patay at isa ang sugatan sa banggaan ng tricycle at closed van sa Dagupan City, Pangasinan, Martes ng hatinggabi. Sa dashcam video, patungong norte ang dilaw na tricycle. Dumire-diretso ito at lumipat sa kabilang linya hanggang makasalubong ang parating na closed van. Sinubukang umiwas ng van pero sumalpok pa rin ang tricycle. Sa lakas ng impact, tumilapon sa kalsada ang driver at pasahero ng tricycle. Dead on arrival sa ospital ang driver habang nagpapagaling pa rin ang kanyang pasahero. Sa Ilocos Norte, isa ang sugatan matapos banggain ng modern jeep ang isang tricycle sa bayan ng Bacarra noong Linggo. Sa kuha ng CCTV, binabaybay ng tricycle ang national highway kasunod ang modern jeep. Nang mag-overtake ang jeep, bigla na lamang pumunta sa kabilang lane ang tricycle, kaya bumangga ang modern jeep sa tricycle. Nagtamo ng sugat ang tricycle driver. Sa Ilocos Sur naman, isa ang sugatan sa banggaan ng kolong-kolong at SUV sa bayan ng Santa Cruz noong Sabado ng gabi. Sa kuha ng CCTV, patungong timog ang SUV nang pansamantalang tumigil sa gilid ng kalsada para lumiko. Paliko na ito nang biglang sumalpok ang paparating na kolong-kolong. Isinugod sa ospital ang driver ng kolong-kolong na nagtamo ng malubhang sugat sa binti. Ligtas naman ang driver ng suv pero nagpositibo sa alcohol breath test. TV Patrol, Martes, 12 Agosto 2025

Isa ang patay at isa ang sugatan sa banggaan ng tricycle at closed van sa Dagupan City, Pangasinan, Martes ng hatinggabi.

Isa ang patay at isa ang sugatan sa banggaan ng tricycle at closed van sa Dagupan City, Pangasinan, Martes ng hatinggabi.