Arestado noong Sabado ang isang 51-anyos na lalaki na akusado sa pagpaslang sa umano’y nanloob sa kanilang bahay noong taong 2000. 

Ayon sa pulisya, sinaksak ng nanloob ang lalaki gamit ang paete kaya't lumaban ito.

“According to him, nung pinasok siya sa bahay niya, pinagsasaksak siya ng paete. Ngayon, 'yung asawa naman niya ay nag-awat, nasaktan din ang asawa niya kaya nung magkaroon siya ng tyempo, bale nadampot niya 'yung pamalo. 'Yun nga lang nadampot niya ay palakol kaya namatay 'yung biktima,” pahayag ni Police LtCol. Jose Luis Aguirre, station commander ng Holy Spirit Police Station.

Giit ng akusado, kilala niya ang nanloob at ipinagtanggol lamang niya ang kanyang pamilya.

“Manliligaw po ‘yun ng biyenan ko dati," aniya.

"Inawat po kami ng misis ko. Nung makita kong may sugat po 'yung misis ko, 'yun po 'yung time na nagkarambola po kami. Then nung sinaksak niya po ako, natamaan po misis ko non, and then pinagtanggol ko na po 'yung sarili ko tsaka 'yung misis ko,” aniya.

Agad sinampahan ng kasong homicide ang akusado na sumuko sa mga awtoridad.

Pansamantala siyang nakalaya noong 2021, ngunit hindi siya nakadalo sa mga hearing sa korte kaya muling binaba ang warrant of arrest laban sa kanya.

Dagdag pa niya, nakasama sa nasunog nilang bahay noong 2024 ang  dokumento ng kanyang paglaya.

“Nag-surety bond po ako non. And then di ko po naasikaso… na mae-expire pala yung bond ko kaya po nababaan po ako ng warrant… nung sinabi ko na napagsilbihan ko na po ‘yan, wala po ako maipakita sa mga awtoridad natin,” sabi ng akusado.

Muling dinala sa kustodiya ng Holy Spirit Police Station sa Quezon City ang akusado habang hinihintay ang resolusyon sa kanyang kaso.