JEDDAH, Saudi Arabia - Arestado ang isang overseas Filipino worker (OFW) matapos niyang mapatay sa pananaksak ang katrabahong Tunisian national sa Jeddah, Saudi Arabia.

Tubong Laguna ang 48-anyos na OFW na 9 na taon nang nagtatrabaho bilang kitchen staff sa isang hotel sa Jeddah. May asawa ito at anak.

Ayon kay Consul General Edgar Badajos ng Philippine Consulate General in Jeddah, base sa kanilang inisyal na imbestigasyon, nangyari ang insidente noong Hulyo 20 nang papasukin sa trabaho ang OFW sa araw na siya ay naka-day off.

"According to his fellow workers, nagreport itong si kababayan, irritated. Kasi nga naka-off duty siya, pinareport siya," aniya.

Dagdag ni Badajos, nagkasagutan umano ang 2 na nauwi sa panununtok hanggang sa masaksak ng OFW ang kaniyang katrabaho.

Depensa naman ng OFW, nauna siyang sinuntok sa ulo ng Tunisian.

"And defense ng ating kababayan ay self-defense kasi nga sinuntok siya sa ulo eh," ani Badajos.

Nakatutok ang konsulado sa kaso at binibigyan ng legal na tulong ang OFW.

"Ang aming message to the family at sa ating mga kababayang sumusubaysay sa kasong ito, of course we are providing assistance to our kababayan, giving him legal representation to ensure he will get a fair trial," ani Badajos.

Ayon sa konsulado, may 4 na witness na Pinoy na kapwa katrabaho ng OFW ang nakakita sa insidente.

Kasalukuyang nakakulong ang OFW habang patuloy ang imbestigasyon sa insidente.

Sa batas ng Saudi Arabia, maaaring hatol na kamatayan ang parusa sa kasong pagpatay. - ulat nina Charles Tabbu at Sherwin Zuniga, ABS-CBN Middle East News Bureau