1 patay, 5 nasagip sa pagkalunod sa Oriental Mindoro

Isang bata ang nasawi habang limang iba pa ang nasagip matapos na malunod habang naliligo sa dagat sa Kabilang Ibayo Beach sa Pola, Oriental Mindoro, nitong Sabado.

Nagtulong-tulong ang mga residente sa pagsagip sa mga nalulunod pero dead on arrival na sa pagamutan ang isang Grade 6 pupil na babae.

Isinugod naman ng mga rescue team sa Oriental Mindoro Community Hospital sa bayan ng Pinamalayan ang 4 pang bata at kanilang 40 taong gulang na tiyuhin.

Ayon kay Johnny Genabe, head ng Pola Municipal Disaster Risk Reduction and Management Office, sa inisyal na imbestigasyon ay napapunta sa malalim na bahagi ng dagat ang mga biktima.

Napag-alaman na dayo lamang sa bayan ng Pola ang mga biktima na taga-Brgy. Bagsok sa bayan ng Socorro.