MANILA — Nakuhanan ng video mula sa iba't ibang parte ng Pilipinas ang pagsabog ng Bulkang Taal nitong Miyerkoles (Oktubre 2), pasado alas-4 ng hapon.

Sa kuha ni Bayan Patroller Jade Salazar, makikita mula sa Nasugbu Highway sa Tagaytay ang unti-unting pagtaas ng ibinuga ng Taal Volcano.

Sa Agoncillo, Batangas naman, nakuhanan ni Bayan Patroller Rey Matienzo ang patuloy na pagtaas ng usok.

Samantala, nasaktuhan naman sa live ni Bayan Patroller Jodee Cacao mula sa Barangay Lumang Lipa sa Mataasnakahoy, Batangas ang dahan-dahang pag-usli ng isang parte ng usok papunta sa kanan habang patuloy itong tumataas.

Phreatomagmatic eruption recorded on Taal

Ayon sa Phivolcs, tumagal ng 11 minuto ang pagsabog ng bulkan at umabot sa 2,400 metro ang taas ng ibinuga nito. 

Tinukoy naman ito ng ahensiya bilang isang "phreatomagmatic eruption" o ang pagputok ng bulkan kung saan nagkadikit ang magma at tubig. —May ulat mula kina Cielo Gonzales at Dabet Panelo (Bayan Mo, Ipatrol Mo), at Chalssea Kate Echegoyen (Bayan Mo, Ipatrol Mo Intern)