10-anyos, pinagsasaksak ng babae sa Taytay, Rizal

MAYNILA — Sugatan ang isang Grade 5 student matapos pagsasaksakin ng isang 18-anyos na babae sa Bgy. Dolores, Taytay, Rizal noong Lunes.

Sa imbestigasyon ng Rizal Police Provincial Office, pauwi na mula sa paaralan at naglalakad sa kalye ang biktima nang biglang undayan ng saksak ng suspek mula sa kanyang likod.

 Nagtamo ng 22 saksak sa iba’t ibang parte ng katawan ang biktima.

 Sa CCTV, makikitang nakatambay sa lugar ang salarin at pagdaan ng biktima ay bigla niyang sinaksak nito. 

Tumigil ito nang mapadaan ang ilang motorista at residente sa lugar na kumausap at umawat sa kanya. 

Tumakas ang suspek at isinugod sa ospital ang bata.

Naaresto naman agad ang suspek at inaalam pa ang motibo sa krimen. 

Narekober mula sa suspek ang 6-pulgadang patalim na ginamit sa pananaksak.

Nasa kustodiya na ng Taytay Municipal Police ang suspek na nahaharap sa kasong frustrated murder.

Nagpapagaling naman sa ospital ang bata.